ජනප්‍රිය මලයාලම් චිත්‍රපට නිළියක්වන මිනු මුනීර් විසින් ඉන්දීය නළුවෙක් සහ නිෂ්පාදකයෙක් වන ජයසූරියට සහ ඉන්දීය සිනමාවේ ප්‍රමුඛ පෙළේ තරුවක් වන එම්. මුකේෂ්ට ලිංගික අතවර චෝදනා එල්ල කර තිබෙනවා.
ෆේස්බුක් හි සටහනක් තබමින්න මිනු මුනීර් පවසා ඇත්තේ 2013 චිත්‍රපටයක රූගත කිරීම්වල දී ජයසූරිය, එම්. මුකේෂ් ඇතුළු තවත් නළුවන් දෙදෙනෙක් විසින් තමන්ව ශාරීරිකව හා වාචිකව අපයෝජනය කළ බවයි.
තමන් එම චිත්‍රපට රූගත කිරීම්වල දී සහයෝගයෙන් කටයුතු කිරීමට උත්සාහ කළ ද ඔවුන්ගේ අපයෝජනය දරාගත නොහැකි වූ බවයි ඇය වැඩිදුරටත් පවසා ඇත්තේ.
මේ හේතුවෙන් තමන්ට මලයාලම් චිත්‍රපට කර්මාන්තයෙන් ඉවත් වී චෙන්නායි හි පදිංචියට යාමට සිදුවූ බව ඇය පවසා තිබෙනවා.
මේ අතර මුකේෂ් සහ ජයසූරිය හැරුණු විට මනියන්පිල්ලේ රාජු, ඉඩවේලා බාබු, අධිනීතිඥ චන්ද්‍රසේකරන්, නිෂ්පාදන පාලක නෝබල් සහ විචු තමා අපයෝජනය කළ බවට ජනප්‍රිය මලයාලම් නිළි මිනු මුනීර් චෝදනා කර සිටිනවා.
“මම දැන් විඳදරාගත් කම්පනය සහ දුක් වේදනා සඳහා යුක්තිය සහ වගවීම අපේක්ෂා කරමි. ඔවුන්ගේ නින්දිත ක්‍රියාවන්ට එරෙහිව පියවර ගැනීමට මම ඔබේ සහාය ඉල්ලා සිටිමි” යනුවෙන් මුනීර් සිය ෆේස්බුක් සටහනේ වැඩිදුරටත් සඳහන් කර තිබෙනවා.
මුනීර්ගේ ලිංගික අපයෝජනයන් පිළිබඳ මෙම හෙළිදරව් කිරීම සිදුකර ඇත්තේ, මලයාලම් චිත්‍රපට කර්මාන්තයේ පුලුල්ව පැතිරී ඇති ලිංගික අපයෝජනයන් විනිශ්චයකාර හේමා කමිටු වාර්තාවෙන් සොයා ගැනීමෙන් පසුව බවයි ඉන්දීය මාධ්‍ය වාර්තා කරන්නේ.
