සංචාරක ඉන්දියානු කණ්ඩායම සහ ශ්‍රී ලංකාව අතර තරග තුනකින් සමන්විත විස්සයි විස්ස තරගාවලිය හෙට (27) ආරම්භ වනවා.
මෙම තරගාවලිය ශ්‍රී ලංකා වේග පන්දු යවන ක්‍රීඩක බිනුර ප්‍රනාන්දුට අහිමිව යන බවට තොරතුරු වාර්තා වනවා.
උණ රෝගය වැළඳීම හේතුවෙන් ඔහුට මෙම තරගාවලියෙන් ඉවත්වීමට සිදුව ඇති බවයි වාර්තා වන්නේ.
ඒ, අනුව දඟ පන්දු යවන ක්‍රීඩක රමේෂ් මෙන්ඩිස් ශ්‍රී ලංකා සංචිතයට ඇතුළත්කර ඇති බවයි ක්‍රිකට් ආරංචි මාර්ග පැවසුවේ.
මේ අතර ආබාධ හේතුවෙන් ශ්‍රී ලංකා සංචිතයට නම්කර සිටි දුෂ්මන්ත චමීර සහ නුවන් තුෂාර විස්සයි විස්ස තරගාවලියෙන් ඉවත් වුණා.
සංචාරක ඉන්දියානු කණ්ඩායම සමඟ පැවැත්වෙන විස්සයි විස්ස තරගාවලියේ කුසලානය එළිදැක්වීම අද (26) මහනුවර දී සිදු කෙරුනේ දෙපිළේම නායකයින්ගේ ප්‍රධානත්වයෙන්.
