ධුර කාලය දිගු නොකළ නිසා නීතිපති විශ්‍රාම යයි (වීඩියෝ)

නීතිපති සංජේ රාජරත්නම්ගේ සේවා කාලය දීර්ඝ නොකිරීම හේතුවෙන්, මේ වනවිට (28) ඔහු නීතිපති ධුරයෙන් විශ්‍රාම ගෙන ඇතැයි වාර්තා වනවා.

නීතිපතිවරයාගේ සේවා කාලය මාස 6කින් දිගු කිරීම සඳහා ජනාධිපතිවරයා දෙවන වරටත් ආණ්ඩුක්‍රම ව්‍යවස්ථා සභාවට කළ
නිර්දේශය ආණ්ඩුක්‍රම ව්‍යවස්ථා සභාව විසින් ප්‍රතික්ෂේප කරනු ලැබුවා.

නීතිපති සංජේ රාජරත්නම් මහතාගේ සේවා දිගුව පිළිබඳව ජනාධිපතිවරයා පළමුව සිදුකළ නිර්දේශය ආණ්ඩුක්‍රම ව්‍යවස්ථා සභාවේ බහුතර ඡන්දයෙන් ප්‍රතික්ෂේප වීමෙන් අනතුරුව, එය යළිත් සළකා බැලීම සඳහා ආණ්ඩුක්‍රම ව්‍යවස්ථා සභාව වෙත පසුගිය දා යොමු කෙරුණා.

කථානායක නිල නිවසේ දී ඊයේ පස්වරු 6.00 ට පමණ රැස්වූ ආණ්ඩුක්‍රම ව්‍යවස්ථා සභාව පැය 4 ක පමණ කාලයක් මේ පිළිබඳව දීර්ඝව සාකච්ඡා කර තිබෙනවා.

කෙසේ වෙතත් පැවති දීර්ඝ සාකච්ඡාවෙන් අනතුරුව ආණ්ඩුක්‍රම ව්‍යවස්ථා සභාව තීරණය කර ඇත්තේ මේ වන විට වයස අවුරුදු 60 සම්පූර්ණ කරන නීතිපතිවරයාට, තවත් සේවා දිගුවක් ලබාදීම සඳහා ආණ්ඩුක්‍රම ව්‍යවස්ථා සභාවට නීතිමය බලයක් නොමැති බවයි.

ඒ අනුව එම සේවා දිගුව ලබා නොදීමට තීරණය කළ බව ආණ්ඩුක්‍රම ව්‍යවස්ථා සභා සාමාජිකයකු අප සමග පවසා සිටියා.

ඒ සම්බන්ධයෙන් වන ආණ්ඩුක්‍රම ව්‍යවස්ථා සභාවේ තීරණය ඊයේ රාත්‍රියේම ජනාධිපතිවරයා වෙත ලිපියක් මගින් දැනුම් දීමට කටයුතු කළ බවයි ඔහු වැඩිදුරටත් පවසා සිටියේ.

ඒ අනුව නීතිපති සංජය රාජරත්නම්ට සිය ධුරයෙන් විශ්‍රාම ගැනීමට සිදු වනවා.