පාකිස්ථාන වේගපන්දු යවන ක්‍රීඩක මොහොමඩ් අමීර් සහ තුන් ඉරියව් ක්‍රීඩක ඉමාඩ් වසීම් ජාත්‍යන්තර ක්‍රිකට් පිටියෙන් සමුගැනීමට ගත් තීරණය වෙනස් කිරීමට තීරණය කර ඇති බව වාර්තා වනවා.
ඒ, අනුව එළැඹෙන විස්සයි විස්ස ලෝක කුසලාන තරගාවලියේ තේරීම් සඳහා තමන් ද සිටින බවයි මෙම ක්‍රීඩකයන් දෙදෙනා පාකිස්ථාන ක්‍රිකට් පාලක මණ්ඩලයට දන්වා ඇත්තේ.
මේ වනවිට 31 හැවිරිදි වියේ පසුවන මොහොමඩ් අමීර් 2020 වසරේ දෙසැම්බර් මාසයේ දී ජාත්‍යන්තර ක්‍රිකට් ක්‍රීඩාවෙන් සමුගන්නා බව දැනුම් දුන්නා.
මේ අතර ඉමාඩ් වසීම් පාකිස්ථානය වෙනුවෙන් අවසන් වරට 2023 වසරේ දී ජාත්‍යන්තර තරගයක් සඳහා ක්‍රීඩා කර ඇති අතර, මෙවර ඔහු පී.එස්.එල්. තරගාවලියේ ඉහළ දක්ෂතා දැක්වීමට සමත් වුණා.
ඔහු නියෝජනය කළ ඉස්ලාමාබාද් යුනයිටඩ් කණ්ඩායම මෙවර ශූරතාව දිනාගැනීමට ද සමත් වූ අතර, අවසන් මහා තරගයේදී කඩුලු පහක් දවා ගනිමින් ඉමාඩ් ජයග්‍රහණය සඳහා ඉහළ දායකත්වයක් ලබා දුන්නා.
මෙම දක්ෂතා මත මේ වනවිට 35 හැවිරිදි වියේ පසුවන ඔහු පවසා ඇත්තේ එළඹෙන ලෝක කුසලාන තරගාවලියේ තේරීම් සඳහා තමන් ද සිටින බවයි.
