රෝගීන්ගේ ආරක්ෂාව හා යහපැවැත්ම සහතික කිරීම උදෙසා ප්රඥප්තියක් සැකසීම වෙනුවෙන් මහජන අදහස් සහ යෝජනා ලබා ගැනීමට සෞඛ්ය පිළිබඳ ආංශික අධීක්ෂණ කාරක සභාව මගින් පත් කළ අනුකාරක සභාවේදී තීරණය වී තිබෙනවා.
ඒ එම අනුකාරක සභාව එහි සභාපති පාර්ලිමේන්තු මන්ත්රී උපුල් ගලප්පත්තිගේ සභාපතිත්වයෙන් පාර්ලිමේන්තුවේදී රැස්වූ අවස්ථාවේදීයි.
රෝගීන්ගේ ආරක්ෂාව සහ යහපැවැත්ම තහවුරු කිරීම ඉලක්ක කර ගනිමින් මෙම ප්රඥප්තියේ කෙටුම්පත සකස් කර ඇති බව නිලධාරීන් කාරක සභාවට පෙන්වා දී තිබෙනවා. මෙම කෙටුම්පත මේ සඳහා වූ සාකච්ඡාවට මූලික ලේඛනය ලෙස යොදා ගැනීමට මෙන්ම රෝගීන් වෙනුවෙන් කටයුතු කරන සියලූ පාර්ශ්වවල අදහස් ලබා ගැනීමට භාවිතා කිරීමටයි තීරණය වී ඇත්තේ.
එමෙන්ම සාමාන්ය ජනතාවගෙන් අදහස් හා යෝජනා ලබා ගැනීමට පියවර ගත යුතු බවද කමිටු සභාපතිවරයා අවධාරණය කර තිබෙනවා. ඒ සම්බන්ධයෙන් පුවත්පත් දැන්වීම් පළ කිරීමට පියවර ගත යුතු බවයි සභාපතිවරයා පෙන්වා දුන්නේ. මහජන අදහස් ලබාගැනීමට සති හයක පමණ කාලයක් ලබාදීම පිළිබඳව ද කාරක සභාව තුළ සාකච්ඡා වුණා. මහජන අදහස් ලබා ගනිමින් ඊට අදාළ වෘත්තීය සමිති, සංවිධාන සහ ආයතන සමඟ සාකච්ඡා කර අවසන් කෙටුම්පත සකස් කිරීමට ද මෙහිදී තීරණය වී තිබෙනවා.
මෙහිදී අදහස් දැක්වූ සෞඛ්ය පිළිබඳ ආංශික අධීක්ෂණ කාරක සභාවේ සභාපති පාර්ලිමේන්තු මන්ත්රී මයන්ත දිසානායක මහතා කාරක සභාවෙන් ඉල්ලා සිටියේ ජාතික මැතිවරණයකට පෙර රෝගීන්ගේ ආරක්ෂාව සහ සුබසාධනය තහවුරු කිරීම පිළිබඳ පනත් කෙටුම්පතක් සම්මත කර ගැනීමට බලාපොරොත්තු වන අතර එබැවින් මෙම ක්රියාවලිය කඩිනමින් සිදුකිරීමට පියවර ගන්නා ලෙසටයි.
මෙම අවස්ථාව සඳහා රෝගීන්ගේ ආරක්ෂාව සහ යහපැවැත්ම සහතික කිරීම සඳහා ප්රඥප්තියක් සකස් කිරීම සඳහා පත් කරන ලද විද්වත් මණ්ඩලයේ නියෝජිතයින් සහභාගී වී තිබෙනවා.
