කාසල්රි ජලාශය වසර තුනකට පසු වාන් දැමීම ආරම්භ වීම නිසා; මේ වනවිට කැලණි ගඟෙහි ජල මට්ටම ද ඉහළ ගොස් ඇති බවට වාර්තා වනවා.
අප ප්‍රාදේශීය වාර්තාකරු පැවසුවේ ඊයේ මධ්‍යම රාත්‍රියේ සිට ඇදහැලෙන ධාරානිපාත වර්ෂාවත් සමග කාසල්රී හි ජල මට්ටම උතුරා ගොස් වාන් දැමීම ආරම්භ වූ බවට එම ජලාශය භාර ඉංජිනේවරුවරයා ප්‍රකාශ කළ බවයි.
ජල විදුලි උත්පාදනයට ප්‍රධාන වශයෙන් ජලය සපයන කාසල්රි ජලාශයේ වාන් දොරටුවක් අගල් 2 1/2 බැගින් එහි ගේට්ටු 13ක් විවෘත කර ඇති බව ද වාර්තා වනවා.
එම ජලාශය වාන් දැමීමත් සමග ඊට පහළින් පිහිටි විමලසුරේන්ද්‍ර ජලාශය ද මධ්‍යම රාත්‍රියේ සිට වාන් දමන බවත්, ජලාශ දෙකම වාන් දමන නිසා කැළණි ගඟෙහි ජල මට්ටම ඉහළ ගොස් ඇති බවත් වාර්තා වනවා.
මවුස්සාකැලේ ජලාශයේ ජල මට්ටම පිටාර මට්ටමට අඩි 03 ක් ආසන්න වී ඇති බවත්, ජලාශ දෙකේම ජල මට්ටම් ඉහළ ගොස් ඇති නිසා විමලසුරේන්ද්‍ර, කැනියොන්, ලක්ෂපාන, නව ලක්ෂපාන, පොල්පිටිය යන ජල විදුලි බලාගාරවල ජල විදුලි උත්පාදනය උපරිම ධාරිතාවෙන් සිදු කරන බවත් විදුලි බලාගාර ඉංජිනේරුවන් සඳහන් කළ බවයි අප ප්‍රාදේශීය වාර්තාකරු පැවසුවේ.
මේ අතර ඇදහැලෙන ධාරානිපාත වර්ෂාව හේතුවෙන් එප්පාවල නගරය ම ජලයෙන් යට වී ඇති අයුරු දක්නට ලැබෙනවා.
අප ප්‍රාදේශීය වාර්තාකරු පැවසුවේ; මේ හේතුවෙන් නගරයේ වෙළෙඳසැල්වල සහ ජන ජීවිතය සම්පූර්ණයෙන් ම අඩාල වී ඇති බවයි.
