මෝටර් රථ ප්‍රවාහන දෙපාර්තමේන්තුවේ වාහන විමෝචන පරීක්ෂණ වැඩසටහන මඟින් අධික දුම පිටකරන වාහන හඳුනාගැනීම සඳහා විශේෂ ඒකකයක් ස්ථාපිත කර තිබෙනවා.
මෙම ඒකකය දිවයින පුරා ප්‍රධාන නගරවල උපායමාර්ගික ස්ථානවල අධික දුම සහිත වාහන ඡායාරූප ගත කිරීම සඳහා නිලධාරීන් යොදවා පොදු මාර්ගවල වාහන විචක්ෂණශීලීව නිරීක්ෂණය කරනු ලබනවා.
ඡායාරූප සාක්ෂි මත පදනම්ව, නඩත්තු නියෝග එදිනම අදාළ වාහන හිමියන්ට නිකුත් කරනු ලබන බවයි මෝටර් රථ ප්‍රවාහන දෙපාර්තමේන්තුව පවසන්නේ.
එවැනි නියෝග ලබා ගන්නා හිමිකරුවන් තම වාහන අලුත්වැඩියා කර නිශ්චිත කාල සීමාව තුළ වේරහැර වාහන විමෝචන පරීක්ෂණ මධ්‍යස්ථානයේ පරීක්ෂාව සඳහා ඉදිරිපත් කළ යුතු වනවා.
නියෝගවලට අනුකූල නොවන හිමිකරුවන් සිටින වාහන මෝටර් රථ ප්‍රවාහන දෙපාර්තමේන්තුවේ දත්ත ගබඩාවේ අසාදු ලේඛනගත කරනු ලබනු ඇති.
වාහන විමෝචන පරීක්ෂණ වැඩසටහනට අනුව, අසාදු ලේඛනගත කර ඇති වාහන ආදායම් බලපත්‍ර ලබා ගැනීමේදී හෝ හිමිකාරිත්වය පැවරීමේදී සැලකිය යුතු සීමාවන්ට මුහුණදීමට සිදුවන බවයි එම දෙපාර්තමේන්තුව සඳහන් කළේ.
