වියළි කාලගුණයෙන් පීඩාවට පත් පුද්ගලයින් සංඛ්‍යාව 93,171ක් දක්වා ඉහළ ගොස් තිබෙනවා.
ආපදා කළමනාකරණ මධ්‍යස්ථානය සඳහන් කළේ, රත්නපුර, ත්‍රිකුණාමලය, පුත්තලම, කුරුණෑගල, යාපනය, මන්නාරම සහ බදුල්ල යන දිස්ත්‍රික්ක 07ට වියළි කාලගුණයෙන් බලපෑම් එල්ල වී ඇති බවයි.
පානීය ජල අර්බුදයෙන් පීඩාවට පත් පවුල් සංඛ්‍යාව 28,947ක්.
පවතින වියළි කාලගුණය හමුවේ විවිධ රෝගාබාධ ඇති විය හැකි බවට සෞඛ්‍ය අංශ අනතුරු අඟවනවා.
නියං තත්ත්වය හේතුවෙන් ජල මූලාශ්‍ර අපිරිසිදු වීම හේතුවෙන් ඉදිරි කාලයේදී පාචනය හා අතීසාරය වැනි රෝග ව්‍යාප්ත වීමේ අවදානමක් පවතින බවයි රජයේ වෛද්‍ය නිලධාරීන්ගේ සංගමයේ සහකාර ලේකම් වෛද්‍ය චමිල් විජේසිංහ මහතා සඳහන් කළේ.
උණුකර නිවාගත් ජලය පානය කිරීමෙන් මෙම රෝගවලින් වැළකීමට හැකියාව ලැබෙන බවත් නියං සමයත් සමග සාමාන්‍ය ජල මුලාශ්‍ර සිඳී යෑම හේතුවෙන් ජලය සපයා ගැනීම ජනතාවට දැඩි ගැටලුවක් බවට පත්ව ඇති බව ද ඔහු ප්‍රකාශ කළා.
පානීය ජල මුලාශ්‍රය පිරිසිදු නොවන බවට ඔබට යම් සැකයක් ඇත්නම් එම ජලය උණුකර නිවා පානය කරන ලෙස ජනතාවගෙන් ඉල්ලා සිටින බවයි වෛද්‍ය චමිල් විජේසිංහ මහතා වැඩි දුරටත් සඳහන් කළේ.
මේ අතර වියළි කාලගුණය හේතුවෙන් වගා හානිවූ ගොවීන්ට වන්දි ලබාදීමට තීරණය කර ඇතැයි, කෘෂිකර්ම අමාත්‍යාංශය පවසනවා.
එහි ලේකම්, ගුණදාස සමරසිංහ මහතා සඳහන් කළේ අක්කරයකට රුපියල් 40,000 සිට වන්දි මුදල් ලබා දෙන බවයි.
ඊට අදාළ තක්සේරු කටයුතු මේ වන විට ආරම්භ කර ඇති බවයි ඔහු ප්‍රකාශ කළේ.
