පිරිත් පිංකමක් අතරතුර කලහකාරී ලෙස හැසිරුණු බව කියන කැකිරාව ප්‍රදේශයේ පාසැලක සිසුන් 07 දෙනෙකු කැකිරාව පොලිස් ස්ථානය මගින් අද (27) අත්අඩංගුවට ගෙන තිබෙනවා.
කැකිරාව ප්‍රදේශයේ පාසැලක පැවැති පිරිත් පිංකමක් අතරතුර එම පාසලේම ඉගෙනුම ලබන සිසුන් පිරිසක් මෙලෙස කලහකාරි ලෙස හැසිරී ඇති බවයි පොලිසිය සඳහන් කළේ.
කලහකාරී ලෙස හැසිරී ඇති එම සිසුන් පාසැලේ ඉදිකර තිබූ පිරිත් මණ්ඩපයටද පහරදී අලාභ හානි කර ඇතැයි සඳහන්.
අදාළ සිසුන්ගේ හැසිරීම සම්බන්ධයෙන් පොලිසියට කරන ලද දැනුම්දීමක් අනුව එම අවස්ථාවේ ප්‍රදේශයේ ජංගම මුර සංචාරයේ නිරතව සිටි පොලිස් නිලධාරීන් පිරිසක් විසින් සැකකාර සිසුන් අත්අඩංගුවට ගැනීමට කටයුතු කර තිබෙනවා.
මෙලෙස පොලිස් අත්අඩංගුවට ගෙන ඇත්තේ අදාළ පාසැලේම 11, 12 සහ 13 ශ්‍රේණිවල ඉගෙනුම ලබන සිසුන් 07 දෙනෙක්.
ඔවුන් අවුරුදු 16, 17 සහ 18 වයස්වල පසු වනවා.
ගනේවල්පොල, කැකිරාව, කුඩා වැව, ඔලොම්බෑව පාර, මැදගම, මහ කැකිරාව සහ ගලපිටගල යන ප්‍රදේශවල පදිංචිකරුවන්.
මෙම කලහකාරී සිදුවීමට නිශ්චිත හේතුව මෙතෙක් අනාවරණ වී නොමැති අතර කැකිරාව පොලිසිය තවදුරටත් ඒ සම්බන්ධයෙන් විමර්ශණ සිදු කරනවා.
