ගාල්ල දිස්ත්‍රික්කය තුල මී උණ පැතිරයාමේ අවදානමක් මතුව ඇති බවත් මෙම වසරේ ගත වූ මාස තුන හමාර තුළ පමණක් මී උණ මරණ 15ක් සිදුව ඇති බව ගාල්ල දිස්ත්‍රික් වසංගත රෝග විද්‍යාඥ එරන්ද හෙට්ටිආරච්චි පවසනවා.
2023 වසරේ ජනවාරි සිට මේ දක්වා කාලය තුළ පමණක් මී උණ රෝගින් 127 දෙනෙකු වාර්තා වී ඇති අතර, මෙම කාලය තුළ සිදුව ඇති මී උණ මරණ සංඛ්‍යාව 15ක්.
මෙම මරණ අතර අවුරුදු දහතුනක පාසල් සිසුවියක් ද සිටින බවයි වෛද්‍ය එරන්ද හෙට්ටිආරච්චි සඳහන් කළේ .
මෙහිදී වැඩිදුරටත් අදහස් දැක්වූ වෛද්‍යවරයා,
“සාමාන්‍යයෙන් කලින් මෙම රෝගය වැළඳුනේ දිනපතා කුඹුරු වැඩ කරන අයටයි. නමුත් දැන් එම අය දැනුවත් නිසා කුඹුරට බැසිමට පෙර ප්‍රතිකාර ගන්නවා. පසුගිය කාලයේ වාරතා වූ රෝගීන් අතර ඉඳහිට කුඹුරට බැහැපු අය වෙනත් කෙනෙකුගේ උදව්වට කුඹුරට බැහැපු අය සරුංගල් අරින්න කුඹුරට බැහැපු ළමයින් කුඹුරු හරහා වෙනත් වැඩවලට ගිය අය සිටිනවා. ඒ වගේම මඩ සහ ජලය ආශ්‍රිත ඉඩම්වල වගා කරන අයත් කීර කොටු වගාකර ගෙන යන අයත් ඉන්නවා.”
කරන්දෙණිය, බද්දේගම, ඉමදුව, බලපිටිය, උඩුගම, යක්කලමුල්ල යන යන කොට්ඨාසවල මේ වනවිට දිස්ත්‍රික්කයේ වැඩිම රෝගින් වාර්තා වී තිබෙනවා.
