පාර්ලිමේන්තුවේ විශේෂ රැස්වීමක් ලබන 14 වන සිකුරාදා කැඳවීමට පාර්ලිමේන්තු කටයුතු පිළිබඳ කාරක සභාව තීරණය කර තිබෙනවා.
නියෝජ්ය කතානායක වෛද්ය රිස්වි සාලිගේ ප්රධානත්වයෙන් එම කාරක සභාව අද (10) රැස්වූ අවස්ථාවේ දී මේ බව තීරණය වී ඇති බව සඳහන්.
පළාත් පාලන ආයතන ඡන්ද විමසීම් (විශේෂ විධිවිධාන) පනත් කෙටුම්පතට අදාළව ශ්රේෂ්ඨාධිකරණයේ ගොනු කර ඇති පෙත්සම්වලට අදාළ තීරණය කතානායකවරයා විසින් පාර්ලිමේන්තුවට දැනුම්දීම සඳහා මෙම විශේෂ රැස්වීම 14 වැනි සිකුරාදා පෙ.ව 9.30 ට කැඳවීමට නියමිතයි.
ඒ අනුව පාර්ලිමේන්තුවේ ස්ථාවර නියෝග 16 හි විධිවිධාන ප්රකාරව අග්රාමාත්යවරිය විසින් කතානායකවරයා වෙත කරනු ලබන ඉල්ලීමක් මත මෙම කැඳවීම සිදු කරනු ලබනවා.
එසේම පෙබරවාරි 14 වනදා මෙම පනත් කෙටුම්පත සළකා බැලීම සඳහා අදාළ අමාත්යාංශයීය උපදේශක කාරක සභාව රැස් කිරීමට ද මෙහිදී තීරණය වී තිබෙනවා.
පළාත් පාලන ඡන්ද විමසීම කඩිනමින් පවත්වන ලෙස ශ්රේෂ්ඨාධිකරණය විසින් නියෝග කර ඇති පසුබිමක ඊට ගරු කිරීමක් ලෙස මැතිවරණය තවදුරටත් ප්රමාදයකින් තොරව පැවැත්වීමේ අවශ්යතාව මෙහිදී සභානායක, අමාත්ය බිමල් රත්නායක මෙහිදී අවධාරණය කර තිබෙනවා.
මේ අනුව පළාත් පාලන ආයතන ඡන්ද විමසීම් (විශේෂ විධිවිධාන) පනත් කෙටුම්පතට අදාළ දෙවැනිවර කියවීමේ විවාදය ලබන 17 වැනි සදුදා පස්වරු 2.00 සිට පස්වරු 7.00 දක්වා පැවැත්වීමටත් මෙහිදී තීරණය වූ බව පාර්ලිමේන්තුවේ වැඩබලන මහලේකම්වරයා සඳහන් කළේ.
එමෙන්ම විපක්ෂය විසින් පනත් කෙටුම්පතට අදාළව ගෙනෙනු ලබන සංශෝධන පෙබරවාරි 17 වැනිදා පෙරවරු 10.00ට පෙර ලබාදීමටත් මෙහිදී එකඟත්වය පළ වී තිබෙනවා.
එමෙන්ම ජනාධිපතිවරයා විසින් මුදල් විෂය භාර අමාත්යවරයා ලෙස 2025 වර්ෂයට අදාළ විසර්ජන පනත් කෙටුම්පත දෙවැනිවර කියවීම ( අයවැය කථාව ඉදිරිපත් කිරීම) පෙර තීරණය කළ පරිදි ලබන 17 වැනි සදුදා පෙරවරු 10.30 ට සිදු කිරීමට නියමිත බව ද වැඩබලන මහලේකම්වරයා වැඩිදුරටත් සඳහන් කළා.
