15 හැවිරිදි පාසල් සිසුවෙක් ගෙළ වැළලාගෙන සියදිවි හානිකර ගැනීමේ සිද්ධියක් සම්බන්ධයෙන් ඉන්දියාවේ රාජස්ථාන් ප්‍රාන්තයේ කොට්පුට්ලි ප්‍රදේශයේ රජයේ පාසලක ගුරුවරුන් දෙදෙනෙකුගේ වැඩ තහනම් කර තිබෙනවා.
මෙම සිසුවා පන්ති කාමරයක් තුළ දී ගෙළ වැළලාගෙන සිටිය දී සොයාගෙන ඇති අතර, මෙම සිද්ධියත් සමඟ ප්‍රදේශවාසීන් පොලිසිය වටලා පාසලට එරෙහිව ක්‍රියාමාර්ගයක් ගන්නා ලෙස බලකරමින් විරෝධතාවයක ද නිරතව ඇති බවයි වාර්තා වුණේ.
කෙසේ වෙතත් පොලීසිය විසින් නඩුවක්‌ ගොනු කර වින්දිතයාගේ පවුලට වන්දි ලබාදෙන බවට පාසලෙන් පොරොන්දු වීමෙන් පසු සිසුවාගේ පවුලේ අය සහ ප්‍රදේශවාසීන් විරෝධතාව අවසන් කිරීමට කටයුතු කළ බවයි ඉන්දීය මාධ්‍ය වාර්තා කළේ.
වැඩ තහනමට ලක්වූ ගුරුවරුන් දෙදෙනාගේ හිරිහැර පිළිබඳව නේවාසිකව රැඳී සිටින අදාළ සිසුවා පසුගිය 22 වනදා ඔහුගේ පියාට දුරකථනයෙන් අමතා පවසා තිබෙනවා.
එහිදී සිසුවා පවසා ඇත්තේ “විවේක් සර් සහ රාජ්කුමාර් සර්” තම පන්තියේ මිතුරන් ඉදිරියේ කුලවාදී මඩ ගසමින් තමාට අවමන් කරන බවයි.
එම ඇමතුමෙන් පැය කිහිපයකට පසු සිසුවා පන්ති කාමරයක ගෙළ වැළලාගෙන ඇති අතර, පසුදින උදෑසන පිරිසිදු කිරීමේ කාර්ය මණ්ඩලය ඔහුගේ සිරුර ’10 – B’ පන්ති කාමරයේ විදුලි පංකාවක එල්ලී තිබෙන අයුරු දැක තිබෙනවා.
ගුරුවරුන් දෙදෙනාගේ මෙම ක්‍රියාව පිළිබඳව විදුහල්පති සහ උප විදුහල්පති දැනුම්වත් කර ඇති නමුත් ගුරුවරු දෙදෙනාට එරෙහිව කිසිඳු පියවරක් නොගෙන ඇති බවයි අනාවරණය වී ඇත්තේ.
