නීතිවිරෝධී මත්ද්‍රව්‍යයක් ලෙස සැලකෙන ‘හෙරොයින්’ ජාවාරමේ යෙදුණු ශ්‍රී ලංකා යුද හමුදාවේ කෝප්‍රල්වරයෙකු සමග තවත් පුද්ගලයකු පොලිස් විශේෂ කාර්ය බලකා නිලධාරීන් අත්අඩංගුවට ගෙන තිබෙනවා.
පොලිස් විශේෂ කාර්‍යය බලකාය පැවසුවේ; මෙම වැටලීම විශේෂ කාර්ය බලකාය ගාල්ල සේනාංක බුද්ධි අංශයේ නිලධාරීන්ට ලද තොරතුරකට අනුව ඊයේ (05) දින රත්ගම පොලිස් වසමේ පල්ලිය පිටිය ප්‍රදේශයේ දී සිදු කළ බවයි.
එහි දී හෙරොයින් ජාවාරම් කරමින් සිටි රත්ගම ප්‍රදේශයේ පදිංචි වයස අවුරුදු 39 හා 46 වියැති පුද්ගලයන් දෙදෙනෙකු හෙරොයින් ග්‍රෑම් 05, මිලි ග්‍රෑම් 850ක් හා මත්ද්‍රව්‍ය ජාවාරමෙන් උපයාගත් මුදල් රු. 147,210ක මුදලක් ද සොයා ගැනුණා.
සැකකරුවන් සිය ජාවාරම් කටයුතු මෙහෙයවීමට යොදාගත් යතුරුපැදියක් පොලිස් භාරයට ගැනුණු අතර වැඩිදුර විමර්ශන කටයුතු රත්ගම පොලිසිය විසින් සිදු කරනු ලබනවා.
වැඩිදුර ප්‍රශ්න කිරීමේ දී හෙළි ව ඇත්තේ; මෙහි එක් සැකකරුවෙකු ශ්‍රී ලංකා යුද හමුදාවේ ඉංජිනේරු බලකායේ යාපනයේ මයිලඩි කඳවුරට අනුයුක්තව රාජකාරි කරන නිලධාරියෙකු බවයි.
