හිටපු රාජ්ය බුද්ධි ප්රධානී, විශ්රාමික මේජර් ජෙනරල් සුරේෂ් සලේ කොළඹ අපරාධ පරීක්ෂණ දෙපාර්තමේන්තුව විසින් අද (25) පෙරවරුවේ අත්අඩංගුවට ගනු ලැබුවා.
මෙම අත්අඩංගුවට ගැනීම සම්බන්ධයෙන් දැනුවත් කිරීම සඳහා විශේෂ මාධ්ය හමුවක්, පොලිස් මාධ්ය කොට්ඨාසයේ දී කැඳවා තිබුණා.
එම සැකකරු අත්අඩංගුවට ගැනීමේ හේතුව මේ වන විට නිල වශයෙන් ප්රකාශ කළ නොහැකි බව එම මාධ්ය හමුවේදී අවධාරණය වුණා.
මෙම මාධ්ය හමුව කැඳවීමට හේතුව හිටපු රාජ්ය බුද්ධි ප්රධානී, විශ්රාමික මේජර් ජෙනරල් සුරේෂ් සලේ අත්අඩංගුවට ගැනීම සම්බන්ධයෙන් නිල වශයෙන් නිවේදනය කිරීම බවත්, ඉදිරි දින කිහිපයේ දී ඔහු අත්අඩංගුවට ගැනීමට නිසි හේතුව නිල වශයෙන් දැනුම්දෙන බවත් මෙම මාධ්ය හමුවේදී ප්රකශ වුණා.
කෙසේ වෙතත් වැඩිදුරටත් අදහස් දැක්වූ බස්නාහිර පළාත භාර ජ්යෙෂ්ඨ නියෝජ්ය පොලිස්පති සජීව මැදවත්ත පවසා සිටියේ අත්අඩංගුවට ගත් හිටපු රාජ්ය බුද්ධි ප්රධානී, විශ්රාමික මේජර් ජෙනරල් සුරේෂ් සලේට පාස්කු බෝම්බ ප්රහාරය සම්බන්ධයෙන් යම්කිසි සම්බන්ධයෙන් තිබෙන බවට සාක්ෂි පවතින බවයි.
අත්අඩංගුවට ගත් සැකකරු පාස්කු ප්රහාරයේ මහාමොලකරුද යන්න සම්බන්ධයෙන් මාධ්යවේදියෙක් නැඟූ ප්රශ්නයකට පිළිතරු දුන් සජීව මැදවත්ත පවසා සිටියේ, ”මොහුගෙන් කරන ප්රශ්න කිරීම් මත වැඩිදුර විමර්ශනවලදී තීරණය කෙරෙයි ඔහුද මහමොලකරු, තවත් කෙනෙක් ඉදිරියෙන් ඉන්නවද කියලා. මේ ආවස්තාවේදී මමත් පොලිස් නිලධාරියෙක් වශයෙන් මොහුව අත්අඩංගුවට අරන් පැය දෙක ඇතුළත අපිට කියන්නේ නැහැ මොහුද මහමොලකරු කියලා. මොහුට යම්කිසි සම්බන්ධයක් තියෙන බවට සාක්ෂි තියෙන බව ඇත්ත, නමුත් ඉදිරියේදී ඔහුගෙන් ප්රශ්න කරලා, ඉදිරි විමර්ශනවලදී තමයි ඒක තීරණය කරන්න වෙන්නේ,” යනුවෙනුයි.
එමෙන්ම මෙම සැකකරුව අත්අඩංගුවට ගනු ලැබුවේ ත්රස්තවාදය වැළැක්වීමේ තාවකාලික විධිවිධාන පනත යටතේ බවත් ඒ අනුව එම සැකකරුව පැය 72ක් රඳවාගෙන ප්රශ්න කරන බවත් පොලීසිය සඳහන් කළා.
