හිටපු ජනාධිපති රනිල් වික්රමසිංහගේ පෞද්ගලික ලන්ඩන් සංචාරයක් සඳහා රජයේ මුදල් අවභාවිත කළ බවට එල්ල වී ඇති චෝදනා සම්බන්ධයෙන්, හිටපු ජනාධිපති ලේකම් සමන් ඒකනායක ලබන පෙබරවාරි 18 වනදා දක්වා යළි රක්ෂිත බන්ධනාගාර ගත කිරීමට කොටුව ප්රධාන මහේස්ත්රාත් ඉසුරු නෙත්තිකුමාර මහතා අද (11) නියෝග කළා.
හිටපු ජනාධිපතිවරයා සිය බිරිඳ වන මහාචාර්ය මෛත්රී වික්රමසිංහගේ උපාධි ප්රදානෝත්සවයකට සහභාගී වීම සඳහා ලන්ඩනය බලා ගොස් තිබුණේ පෞද්ගලික සංචාරයක් වශයෙන්.
කෙසේ වෙතත්, එම සංචාරය සඳහා වැය වූ රුපියල් කෝටි එකහමාරකට (මිලියන 15කට) අධික මුදලක් රජයේ ප්රතිපාදනවලින් වැය කර ඇති බවට අපරාධ පරීක්ෂණ දෙපාර්තමේන්තුව මගින් අධිකරණයට කරුණු වාර්තා කර තිබෙනවා.
අද දින නඩුව කැඳවූ අවස්ථාවේදී අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි අතිරේක සොලිසිටර් ජනරාල් දිලීප පීරිස් කරුණු දක්වමින් සඳහන් කරේ මෙම සංචාරය පෞද්ගලික එකක් වුවද, ඊට අදාළ වියදම් රජය වෙත පැවරීමට හිටපු ජනාධිපති ලේකම්වරයා ආධාර අනුබල දී ඇති බවයි.
එසේම රජයේ මුදල් අයථා ලෙස පරිහරණය කිරීම සම්බන්ධයෙන් විමර්ශන තවදුරටත් ක්රියාත්මක වන බවද සඳහන් කළා.
දෙපාර්ශවයේ කරුණු සලකා බැලූ මහේස්ත්රාත්වරයා, සැකකාර සමන් ඒකනායකව ලබන 18 වනදා දක්වා රක්ෂිත බන්ධනාගාර ගත කිරීමට නියෝග කළ අතර, එදිනට විමර්ශනවල ප්රගතිය වාර්තා කරන ලෙසද දැනුම් දුන්නා.
