අපරාධ පරීක්ෂණ දෙපාර්තමේන්තුව මගින් අත්අඩංගුවට ගත් හිටපු අමාත්‍ය ජොන්ස්ටන් ප්‍රනාන්දු මහතා කොටුව මහෙස්ත්‍රාත් අධිකරණය හමුවට ඉදිරිපත් කිරීමෙන් පසු ඔක්තෝබර් 30 දක්වා රක්ෂිත බන්ධනාගාරගත කරන ලෙස කොටුව මහේස්ත්‍රාත් තනුජා ලක්මාලි මහත්මිය නියෝග කර තිබෙනවා.
BMW වර්ගයේ මෝටර් රථයක් කොළඹ ප්‍රධාන පෙළේ හෝටලයක සැකකටයුතු ලෙස නවතා තැබීමේ සිද්ධියට අදාළව ප්‍රකාශයක් ලබාදීම සඳහා ඔහු අද (23) පෙරවරුවේ අපරාධ පරීක්ෂණ දෙපාර්තමේන්තුව හමුවට පැමිණීමෙන් අනතුරුව අත්අඩංගුවට ගැනුණා.
තමා මේ සම්බන්ධයෙන් අපරාධ පරීක්ෂණ දෙපාර්තමේන්තුවට ප්‍රකාශයක් ලබාදීමට සුදානම් බව ඊයේ (22) හිටපු අමාත්‍ය ජොන්ස්ටන් ප්‍රනාන්දු මහතා සිය නීතිඥවරයා මාර්ගයෙන් අභියාචනාධිකරණයට දැනුම්දුන්නා.
එහිදී එම ප්‍රකාශය ලබාදීමේ දී තමාව අත්අඩංගුවට නොගන්නැයි’ කියා හිටපු අමාත්‍ය ජොන්ස්ටන් ප්‍රනාන්දු මහතා සිය නීතිඥවරු මගින් අධිකරණයෙන් ඉල්ලා සිටියා.
ඒ අවස්ථාවේදී අභියාචනාධිකරණ විනිසුරු මොහොමඩ් ලෆාර් මහතා සඳහන් කළේ ප්‍රකාශය ලබාදීමට ප්‍රථමයෙන් බියවීමට හේතුවක් නොමැති බවත් මුලින්ම එම ප්‍රකාශය අපරාධ පරික්ෂණ දෙපාර්තමේන්තුව ලබාදීමට කටයුතු කරන ලෙසයි.
මේ අතර අද අල්ලස් කොමිසම විසින් ගොනුකර ඇති නඩුවකට පෙනී නොසිටීම හේතුවෙන් හිටපු අමාත්‍ය ජොන්ස්ටන් ප්‍රනාන්දු මහතා අත්අඩංගුවට ගෙන ඉදිරිපත් කරන ලෙස කොළඹ මහාධිකරණය ද වරෙන්තුවක් නිකුත් කළා.
මෙම නඩුව අද කොළඹ මහාධිකරණ විනිසුරු මංජුල තිලකරත්න මහතා ඉදිරියේ කැඳවූ අවස්ථාවේදී විත්තිකරු ජොන්ස්ටන් ප්‍රනාන්දු මහතා අධිකරණයේ පෙනී නොසිටියා.
ඊට හේතුව ලෙස හිටපු අමාත්‍යවරයා වෙනුවෙන් පෙනී සිටි නීතිඥවරයා සඳහන් කළේ අපරාධ පරික්ෂණ දෙපාර්තමේන්තුව වෙත ප්‍රකාශයක් ලබාදීමට ගිය බැවින් මෙම අධිකරණයට පැමිණිමට නොහැකි වු බවයි.
එහිදි මහාධිකරණ විනිසුරුවරයා විමසා සිටියේ විත්තිකරු එසේ ප්‍රකාශයක් ලබාදීමට ගියේ අභියාචනාධිකරණ නියෝගයක් මත ද යන්නයි.
ඊට පිළිතුරු දුන් නීතිඥවරයා කියා සිටියේ එවැනි නියෝගයක් අභියාචනාධිකරණ නිකුත් කර නොමැති බවයි.
එහිදි මහාධිකරණ විනිසුරුවරයා කියා සිටියේ විත්තිකරු කුමන කටයුත්තයට ගියත් එය තම අධිකරණයට අදාළ නොවන බවත් තම අධිකරණයට නිකුත් කර ඇති නියෝගය අනුව කටයුතු නොකිරීම අධිකරණ නියෝග පැහැර හැරිමක් බවයි.
ඒ අනුව මහාධිකරණ විනිසුරුවරයා විත්තිකරු අත්අඩංගුවට ගෙන අධිකරණයට ඉදිරිපත් කරන ලෙසට නියෝග කළා.
