හිඟුරක්ගොඩ, දිවුලන්කඩවල ප්‍රදේශයේ පැවති සංගීත සංදර්ශනයක් අතරතුර ඇති වූ ප්‍රචණ්ඩකාරී සිදුවීම් සම්බන්ධයෙන් පුද්ගලයින් 06 දෙනෙකු අත්අඩංගුවට ගෙන තිබෙනවා.
පෙරේදා (14) රාත්‍රියේ දිවුලන්කඩවල ජනාධිපති විද්‍යාල ක්‍රීඩාංගණයේ පැවති සංගීත සංදර්ශනයක් අතරතුර මෙම කළහකාරී තත්ත්වය හටගෙන තිබූ අතර, එහිදී වේදිකාවට, සංගීත උපකරණ ඇතුළු දේපළවලට දැඩි ලෙස අලාභ හානි සිදුකර තිබුණා.
ප්‍රසංගය සඳහා සහභාගී වන බවට ප්‍රකාශ වී තිබූ ගායකයින් දෙපළක් ඒ සඳහා සහභාගී නොවීමත් සමඟ අලුයම 1.30ට ප්‍රසංගය අවසන් කරන බවට සංවිධානයකින් දැනුම්දී තිබෙනවා.
ඒ, සමඟ එය නැරඹීමට පැමිණි ප්‍රේක්ෂකයින් ප්‍රචණ්ඩකාරී ලෙස හැසිරී මෙලෙස දේපළවලට හානි සිදුකර ඇති බවයි වාර්තා වුණේ.
සංවිධායකයින් විසින් මෙම ප්‍රසංගය නැරඹීම වෙනුවෙන් රුපියල් 1,000 සහ 2,500 ලෙස ප්‍රවේශ පත්‍ර අලෙවි කිරීමට ද පියවර ගෙන තිබෙනවා.
සංගීත ප්‍රසංගයේ ආරක්ෂාව සඳහා පොලිස් නිලධාරීන් 45 දෙනෙකු පමණ යොදවා තිබුණ ද ඇති වූ තත්ත්වය පාලනය කිරීමට ඔවුන්ට ද නොහැකි වී ඇති බව වාර්තා වුණේ.
අත්අඩංගුවට ගැනුණු සැකකරුවන් හයදෙනා අධිකරණය වෙත ඉදිරිපත් කිරීමට නියමිත බවයි පොලිසිය සඳහන් කළේ .
.
