එංගලන්ත පිතිකරු හැරී බෲක් ඉන්දියාවේ සංචාරය කිරීමට නියමිත එංගලන්ත ටෙස්ට් සංචිතයෙන් ඉවත්ව ඇති බව වාර්තා වනවා.
පෞද්ගලික හේතුවක් මත බෲක් මෙලෙස එම තරග සංචාරයෙන් ඉවත්ව ඇති බවයි ක්‍රීඩා මාධ්‍ය වාර්තා කරන්නේ.
ඒ, අනුව එක්සත් අරාබි එමීර් රාජ්‍යයේ පැවති පුහුණු කඳවුරේ සිටි හැරී බෲක් යළි එංගලන්තය බලා පිටත්ව ගොස් තිබෙනවා.
තරග පහකින් සමන්විත තරගාවලියෙන් ඔහු ඉවත්වීමත් සමඟ එංගලන්තය ඩෑන් ලෝරන්ස් සංචිතයට කැඳවා ඇති බවයි වාර්තා වුණේ.
ලබන බ්‍රහස්පතින්දා මෙම තරගාවලියේ පළමු තරගය ආරම්භවීමට නියමිත අතර එංගලන්ත ටෙස්ට් කණ්ඩායම අද (21) දිනයේ හයිද්‍රාබාද් වෙත පැමිණීමට නියමිත බවයි ක්‍රීඩා මාධ්‍ය වාර්තා කළේ.
බෲක්ගේ අහිමිවීම දශකයකට වැඩි කාලයක සිට ඉන්දියාවේ දී ටෙස්ට් තරගාවලියක් ජයගත් පළමු කණ්ඩායම බවට පත්වීමට එංගලන්තය දරණ උත්සාහයට සැළකිය යුතු පහරක් එල්ල කරන බවයි ක්‍රිකට් විචාරකයින් පවසන්නේ.
