විවේචනයන් සාධාරණව සලකාබලා ස්වකීය බුද්ධියෙන් රට මෙහෙයවිය යුතුබව බෞද්ධ උපදේශක සභාව විසින් ජනාධිපති ගෝඨාභය රාජපක්ෂ මහතා වෙත ප්‍රකාශකර තිබේ.
සියලු අදහස්වලට පිළිතුරු ලබාදීමට යෑමෙන් වැඩ කිරීමට ඇති වටිනා කාලය අපතේ යාහැකි බවද බෞද්ධ උපදේශක සභාව ජනාධිපතිවරයාට පෙන්වාදී තිබේ.
08 වැනි වරට බෞද්ධ උපදේශක සභාව ජනාධිපති කාර්යාලයේ දී ඊයේ (12) රැස්වූ අවස්ථාවේ මෙම අදහස් පළවු බව ජනාධිපති මාධ්‍ය අංශය සඳහන් කරයි.
ඇතමුන් කුමන ප්‍රකාශ කළ ද මහ සංඝරත්නය සහ ජනතාව ජනාධිපතිවරයා කෙරෙහි නොමඳ විශ්වාසයක් තබාඇති බව මහ සංඝරත්නය එහිදී සඳහන්කර තිබේ.
නොයෙකුත් පාර්ශ්ව එල්ලකරන පදනම් විරහිත චෝදනා සහ අපහාසවලින් රජය අධෛර්යමත් නොවිය යුතු අතර ප්‍රතිපත්තිගරුකව රට පාලනයකරන ලෙස මහ සංඝරත්නය මෙහිදී ජනාධිපති ගෝඨාභය රාජපක්ෂ මහතාට දැනුම් දුන් බව ජනාධිපති මාධ්‍ය අංශය පැවසීය.
තානාපති සේවය ඇතුළු තනතුරුවලට පත්කිරීමේදී ජනාධිපතිවරයා ගෙනයන ක්‍රියාදාමයට පැසසුම් කළ මහ සංඝරත්නය මියන්මාරය, තායිලන්තය වැනි රටවලට පත්කෙරෙන තානාපතිවරු පන්සිල් රකින, දර්ශනයක් සහිත පුද්ගලයන් වියයුතු බව එහිදී ප්‍රකාශ කර ඇත.
බුද්ධ චරිතය, බෞද්ධ දර්ශනය, පුරාවිද්‍යාත්මක හා පෞරාණික ස්ථානවලට දෙන වැරදි අර්ථකථන නතර කිරීමේ අවශ්‍යතාව ද මහ සංඝරත්නය විසින් මෙහිදී අවධාරණයකර තිබේ.
ඒ සඳහා බෞද්ධ ග්‍රන්ථ සහ ප්‍රකාශන නියාමන පනත සක්‍රීය කිරීම සහ ත්‍රිපිටක සංරක්ෂණ මණ්ඩලය සක්‍රීය කිරීම සිදු කළයුතු බව බෞද්ධ උපදේශක සභාව පෙන්වාදුන් බව ජනාධිපති මාධ්‍ය අංශය වැඩිදුරටත් සඳහන් කරයි.
