අමාත්ය සුනිල් හඳුන්නෙත්ති මහතාගේ නම හා රුව භාවිතා කරමින් සමාජ මාධ්ය ජාලා ඔස්සේ දෙස් විදෙස් ජනතාවගෙන් වංචනික ලෙස මුදල් එක් රැස් කළ බව කියන සැකකරුවන් වහා අත්අඩංගුවට ගෙන අධිකරණයට ඉදිරිපත් කරන ලෙස කොළඹ අතිරේක මහේස්ත්රාත් මොහොමඩ් රිස්වාන් මහතා අද (30) අපරාධ පරීක්ෂණ දෙපාර්තමේන්තුවට නියෝග කළා.
සිද්ධියට අදාළ ව සිදු කෙරෙන විමර්ශන කටයුතු සඳහා සැකකරුවන් ලෙස හඳුනාගෙන ඇති පුද්ගලයන්ගේ බැංකු වාර්තා කැඳවන ලෙසට ද මහේස්ත්රාත්වරයා මෙහිදී නියෝග කළ බවයි දසත අධිකරණ වාර්තාකරු පැවසුවේ.
කර්මාන්ත ව්යවසායකත්ව හා සංවර්ධන අමාත්ය සුනිල් හඳුන්නෙත්ති මහතා අපරාධ පරීක්ෂණ දෙපාර්තමේන්තුවට කරන ලද පැමිණිල්ලක් සලකා බැලීමෙන් අනතුරුව අධිකරණයෙන් මෙම නියෝගය නිකුත් කෙරුණා.
කිසියම් පිරිසක් තමාගේ නම හා රුව ප්රදර්ශනය කරමින් වට්ස් ඇප් ඇතුළු සමාජ මාධ්ය ජාලා ඔස්සේ දෙස් විදෙස් ජනතාවගෙන් මුදල් රැස් කර ඇති බවට තොරතුරු ලැබී ඇති බැවින් ඒ පිළිබඳව විමර්ශනයක් ආරම්භ කරන ලෙසට අමාත්ය සුනිල් හඳුන්නෙත්ති මහතා අපරාධ පරීක්ෂණ දෙපාර්තමේන්තුව වෙත කර තිබූ පැමිණිල්ලක් අනුව එම සිද්ධිය අධිකරණය හමුවේ කැඳවනු ලැබුවා.
එම සැකකරුවන් හඳුනාගෙන ඔවුන් අත්අඩංගුවට ගැනීම සඳහා මේ වන විට විමර්ශන සිදු කරමින් පවතින බවත් ඊට අදාළ ව ඔවුන්ගේ බැංකු වාර්තා කැඳවීම සඳහා අවසර ලබාදෙන ලෙසත් එම විමර්ශන නිලධාරීන් අධිකරණයෙන් ඉල්ලා සිටියා.
එම විමර්ශන නිලධාරීන් අධිකරණය හමුවේ දැක්වූ කරුණු සලකා බැලු මහේස්ත්රාත්වරයා සිද්ධියට අදාළ ප්රගති වාර්තාවක් කඩිනමින් අධිකරණයට ඉදිරිපත් කරන ලෙසට ද වැඩිදුරටත් නියෝග කළා.
