“සෙනෙහෙ පියස” ජාතික යොවුන් සේනාංකයේ “සමාජ සවිබල ගැන්වීමේ තරුණ දායකත්ව ව්‍යාපෘතිය යටතේ ඉදිකළ 32 වැනි නිවාසය පරිත්‍යාග කිරීමේ අවස්‍ථාව ක්‍රීඩා අමාත්‍ය රොෂාන් රණසිංහගේ ප්‍රධානත්වයෙන් පැවැත්වුණා.
ඒ මැදිරිගිරියේ දීයි.
තිරසාර සංවර්ධන අභිමතාර්ථ කේන්ද්‍රකොට ගනිමින් ශ්‍රී ලංකාවේ ආර්ථිකය ශක්තිමත් කරමින්, තරුණ ශක්තිය ජාතික සංවර්ධනය සඳහා යොමු කරවීමට ප්‍රමුඛ මෙහෙවරක් ඉටු කරන ජාතික යොවුන් සේනාංකයේ “සමාජ සවිබල ගැන්වීමේ තරුණ දායකත්ව ව්‍යාපෘතිය හරහා ක්‍රියාත්මක නිවාස 58ක් ඉදිකිරීමේ ව්‍යාපෘතියේ 32 වැනි නිවාසයයි මෙලෙස ඉදිවුණේ.
මෙම නව නිවාසය ඉදිව ඇත්තේ; මැදිරිගිරිය ප්‍රාදේශීය ලේකම් කොට්ඨාසයේ, අංක 91 කවුඩුළුගම ග්‍රාමසේවා වසමට අයත් මැදිරිගිරිය – කවුඩුළුගම, අංක 269/2හි යි.
අදාළ නිවස පරිත්‍යාග කර ඇත්තේ විශේෂ අවශ්‍යතා සහිත දරුවෙකු සිටින හා දියවැඩියාව ඇතුළු රෝගාබාධ රැසකට ගොදුරු ව රැකියාවක නියැලීමට නොහැකි ව දැඩි ආර්ථික අපහසුතාවකට ලක් ව අසරණ ව සිටින ආර්.ඩී.විජේසිංහ හා ජී.ජී.ප්‍රේමවතී යුවල වෙතයි.
ප්‍රදේශයේ ව්‍යාපාරික ප්‍රජාව ඇතුළු පරිත්‍යාගශීලීන්ගේ දායකත්වය ද ඇතුළුව මුදලින් රුපියල් ලක්ෂ 18කට ආසන්න පිරිවැ‍යකින් හා මැදිරිගිරිය ජාතික යොවුන් සේනාංක මධ්‍යස්ථානයේ ශ්‍රමදායකත්වය යටතේ මෙම නිවස ඉදි කෙරුණා.
මීට අමතර ව ඔවුන්ගේ ආර්ථිකය ශක්තිමත් කිරීම සඳහා සුදුසු ස්වයං රැකියාවන් හඳුන්වාදීම ද මෙම ව්‍යාපෘතිය හරහා බලාපොරොත්තු වනු ඇති.
ජාතික යොවුන් සේනාංකයේ මෙවැනි ව්‍යාපෘති හරහා ඉටුවන ජාතික මෙහෙවර හා ව්‍යාපෘති සාර්ථක කරගැනීම සඳහා ගන්නාවූ වෙහෙස හා කැපකිරීම සබැඳි ව සේවා ඇගයීමක් හා ඊට ලබාදෙන ආශිර්වාදයක් ලෙස, මින් ඉදිරියට ඉදිවන සෑම නිවසක් සඳහා ම රු:100,000.00 මුදලක් තම පෞද්ගලික මූල්‍ය පරිත්‍යාග ලෙස ලබාදීමට ද බලාපොරොත්තු වන බව උත්සව සභාව අමතමින් අමාත්‍ය රොෂාන් රණසිංහ ප්‍රකාශ කළා.
