සුබසාධන ප්‍රතිලාභ ලබා ගැනීම සඳහා අයදුම්පත් 3,710,000ක් මේ වනවිට ලැබී ඇති බව මුදල් රාජ්‍ය අමාත්‍ය ශෙහාන් සේමසිංහ සඳහන් කරනවා.
එම අයදුම්පත් ජාලගත කිරීම මේ වනවිට සිදුව ඇති බවයි රාජ්‍ය අමාත්‍යවරයා පැවසුවේ.
මීළග අදියර යටතේ නිවෙස් වෙත ගොස් අදාළ තොරතුරු රැස් කිරීම ආරම්භ කිරීමට නියමිත අතර, අදාළ කටයුතු ග්‍රාම නිලධාරීන්, සංවර්ධන නිලධාරීන් ඇතුලු පාර්ශ්ව අතින් සිදු විය යුතු බවයි ඔහු පෙන්වා දෙන්නේ.
සුබ සාධන ප්‍රතිලාභ මණ්ඩලය යටතේ ප්‍රතිලාභීන් ලියාපදිංචි කිරීම සම්බන්ධයෙන් මතුව ඇති ගැටලු සාකච්ඡා කිරීම සඳහා වෘත්තිය සමිති නියෝජිතයන් සමඟ පැවති හමුවක දී අමාත්‍යවරයා මේ බව කියා සිටියා.
එහි දී ප්‍රධාන වශයෙන් ම නිවෙස් කරා ගමන් කිරීමට අවශ්‍ය ඉන්ධන ලබාදීම සඳහා දැනටමත් අවශ්‍ය කටයුතු සම්පාදනය කර ඇතැයි අමාත්‍යවරයා මෙහිදී පැවසුවා.
ඒ, අනුව දැනට සතියකට ලැබෙන ලීටර් 04 ඉන්ධන කෝටාවට අමතර යම් කාලයක් සඳහා අදාළ නිලධාරීන්ට ඉන්ධන ලබාදීමට නියමිත බවයි ඔහු වැඩිදුරටත් සඳහන් කර සිටියේ.
එහිදී අදහස් දක්වා සිටි රාජ්‍ය අමාත්‍යවරයා,
“මෙම සුබසාධන ප්‍රතිලාභ ලබා දීම සම්බන්ධයෙන් හඳුන්වාදෙනු ලබන නෛතික හා පරිගණක පද්ධතියන්හි යම් යම් ගැටළු හෝ අඩුපාඩු තිබේනම් ඒවා කඩිනමින් වෙනස් කිරීමට එකගතාවයන් පළ කරලා තිබෙනවා. ඒ නිසා මේ සඳහා සහයෝගය දෙන්න. අපේ රටේ නීතියට හැමෝම බයයි. ඒ නිසා වැරදි තොරතුරු ඉදිරිපත් කිරීමේ අවධානම පිළිබඳව ඉදිරියේ දී ජනතාව දැනුවත් කරනවා. නිවැරදි තොරතුරු ලබා දීමට ජනතාව ක්‍රියා කළ යුතුයි. නිළධාරීන් කණ්ඩායමක් ඉලක්ක කරගෙන කටයුතු කරන්න රජයේ කිසිඳු අභිප්‍රායක් නැහැ. ඒ නිසා සියළු දෙනා එකඟව මෙම කටයුත්ත කඩිනමින් ඉටු කරමු.”
