මේ වනවිට රුපියල් 2350ක මිලකට අලෙවි වන සිමෙන්ති කොට්ටයක මිල මෙම සතිය තුළදී තවත් රුපියල් 400කින් පමණ ඉහළ දැමීමට සිමෙන්ති ආනයනකරුවන්ගේ සංගමය පියවර ගෙන ඇති බැවින් ඔවුන්ට පාඩමක් ඉගැන්වීම සඳහා තමන්ගේ සියලු ම ඉදිකිරීම් කටයුතු මාස තුනක කාලයක් සඳහා නවතා දමන ලෙස තමා මෙරට ජනතාවගෙන් ඉල්ලා සිටින බව ශ්‍රී ලංකා ජාතික ඉදිකිරීම් සංගමයේ සභාපති සුසන්ත ලියනාරච්චි පැවසීය.
සිමෙන්ති කොට්ටයක් තබා ගත හැකි උපරිම කාලය දින 25ක් පමණක් බව ත් තමා ප්‍රකාශ කළ ආකාරයට මාස තුනක කාලයක් සඳහා ඉදිකිරීම් කටයුතු නවතා දැමුවහොත් එම සිමෙන්ති ගාලු මුව‍ෙදාර ආශ්‍රිතව ඉදිකෙරෙන ව්‍යාපෘතියේ මුහුදට දැමීමට ඔවුන්ට සිදුවන බව ද ඔහු පැවසීය.
ජනතාවට ජීවත්වීමට නොහැකි තරම් ආර්ථික අපහසුතාවලින් පෙළෙන අවස්ථාවක මේ ආකාරයට සිමෙන්ති මිල ඉහළ දැමීමට පියවර ගැනීම ජනතාවට සිදු කරන අසාධාරණයක් බව ද ඔහු පැවසීය.
මෙම ආනයනකරුවන් පසුගිය ජනවාරි මාසයේ සිට මාර්තු මාසය දක්වා මාස තුන තුළ ම ඔවුන්ට හිතු හිතු මනාපයට සිමෙන්ති මිල ඉහළ දැමූ බව ද සභාපතිවරයා පැවසීය.
සිමෙන්ති ආනයනකරුවන් මෙම සතිය තුළදී රුපියල් 400කින් පමණ සිමෙන්ති කොට්ටයක මිල ඉහළ දැමීමට සූදානම් වන බව ත් එසේ වුවහොත් එම කොට්ටයක මිල රුපියල් 3000ට ආසන්නව මිල ඉහළ යාමට ඉඩ ඇති බව ද ඔහු පැවසීය.
පසුගිය අවුරුදු දිනවලින් පසුව තම සංගමය සියලු ම ඉදිකිරීම් කටයුතුවලින් ඉවත් වූ බව ද එම ඉවත් වීම නිසා තම සංගමය හරහා මෙරට දළ දේශීය නිෂ්පාදනයට ලැබීමට නියමිතව තිබූ 12.5ක දායකත්වය මේ වසර තුළ අහිමි වෙන බව ද ඔහු පැවසීය.
මේ පිළිබඳව සොයා බැලීමට කිසිදු ඇමතිවරයකු හෝ බලධාරියකු නොමැති බව ත් එම නිසා කිසිදු පාලනයකින් තොරව සිමෙන්ති මිල ඉහළ යාමට බලධාරීන්ද එම ආනයනකරුවන්ට ඉඩදී ඇති බව ඔහු වැඩිදුරට ත් පැවසීය.
