මාතර – තෙලිජ්ජවිල ප්රදේශයේ සොරකමක් සම්බන්ධයෙන් අත්අඩංගුවට ගත් සැකකරුවෙකුට අමානුෂික ලෙස පහරදීම සම්බන්ධයෙන් එවකට මාලිම්බඩ පොලිසියේ ස්ථානාධිපති ඇතුළු පොලිස් නිලධාරීන් සිව්දෙනෙකු ලබන ජුනි මස 05 දින තෙක් රක්ෂිත බන්ධනාගාර ගත කරන ලෙස මාතර ප්රධාන මහේස්ත්රාත් අරුණ බුද්ධදාස මහතා නියෝග කළා.
2020 වර්ෂයේ අගෝස්තු මස 20 දින මාතර, තෙලිජ්ජවිල ප්රදේශයේ රට බීම අලෙවිසැලක් බිඳ භාණ්ඩ සොරකම් කිරීමේ සිද්ධියකට සැකපිට එම ප්රදේශයේ පදිංචි පුද්ගලයෙකු මාලිම්බඩ පොලිසිය මගින් අත්අඩංගුවට ගෙන තිබූ අවස්ථාවේ දී ඔහුට අමානුෂික අන්දමින් පහර දුන් බවට එවකට මාලිම්බඩ පොලීසියේ සේවය කළ, පොලිස් ස්ථානාධිපති, ප්රධාන පොලිස් පරීක්ෂක සී. ජයවික්රම, අපරාධ විමර්ශන අංශයේ ස්ථානාධිපති සමන්ත විජේසේකර, මාලිම්බඩ පොලිසියට අනුයුක්තව සේවය කළ පොලිස් කොස්තාපල් සමන් විජේවර්ධන හා මාතර පොලීසියේ අපරාධ විමර්ශන අංශයේ ස්ථානාධිපති නුවන් බුද්ධික විජයතුංග යන පොලිස් නිලධාරීන්ට විරුද්ධව පොලිස් විශේෂ විමර්ශන ඒකය මගින් අද (22) දින මාතර ප්රධාන මහේස්ත්රාත් අධිකරණයේ දී නඩු පවරා තිබුණා.
එහිදියි අධිකරණ විනිසුරුවරයා සැකකරුවන් ව රක්ෂිත බන්ධනාගාරගත කරන ලෙසට නියෝග කළේ.
එම නඩුව තීන්දුව ලබාදෙමින් මාතර ප්රධාන මහේස්ත්රාත්වරයා කියා සිටියේ මෙම සැකකරුවන් සිව්දෙනාටම විරුද්ධ ව පවතින චෝදනාවලට මුල් වූ සිදුවීම සිදු වී ඇත්තේ 2020 වර්ෂයේ වන අතර මේ වන විට දීර්ඝ කාලයක් ගතව ඇතත් නිසි විමර්ශනයක් සිදු ව නැත්තේ, මෙම සැකකරුවන් සිව්දෙනා පොලිසියේ ඉහළ නිලතල දරන පුද්ගලයින් වන බැවින් බවයි.
එබැවින් මෙම නඩුවට අදාළව සම්පූර්ණ විමර්ශනයක් සිදු කළ යුතුව පවතින හෙයින් මෙම සැකකරුවන්ට ඇප ලබාදීමක් සිදු වුවහොත් එම විමර්ශනවලට බාධාවක් ඇති විය හැකි බැවින් සැකකරුවන් සිව්දෙනා රක්ෂිත බන්ධනාගාරගත කිරීමට නියෝග කෙරුණා.
