ඉදිරි ජනාධිපතිවරණයට තමන් ජනාධිපති අපේක්ෂකයෙකු ලෙස තරග කරන බව පාර්ලිමේන්තු මන්ත්රී ෆීල්ඩ් මාර්ෂල් සරත් ෆොන්සේකා පවසනවා.
X ගිණුමෙහි සටහනක් තබමිනුයි ඒ මහතා මේ බව සඳහන් කර ඇත්තේ.
සරත් ෆොන්සේකා සිය නිල X ගිණුමෙහි සටහනක් තබමින් කියා ඇත්තේ තමන් මෙවර ජනාධිපතිවරණයට තරගකරුවෙකු ලෙස ඉදිරිපත් වීම මෙලෙස රටේ මහජනතාවට නිල වශයෙන් දැනුම්දීමට කැමති බවයි.
76 වසරක සිට රටක් වශයෙන් අප බංකොලොත්භාවයට ගිය බවත්; අකාර්යක්ෂම දේශපාලන කණ්ඩායමක් විසින් අපව මෙහෙයවනු ලැබූ බව ද ඒ මහතා එම පණිවිඩයේ සඳහන් කර තිබෙනවා.
ශ්රී ලංකාව සංවර්ධනය කිරීමට නම් දූෂණය නවතාලීම කළ යුතු අතර; මෙරට ආදායම් මාර්ග උත්පාදනයට ස්වාභාවික සම්පත් දායක කරගත යුතු බව ද එහි සඳහන්.
ශ්රී ලංකාව ඉදිරියට ගෙන යාමට තමන් සමග එක්වන ලෙස සෑම ශ්රී ලාංකිකයෙකුට ම මෙලෙස නිල වශයෙන් තමන් ආරාධනා කරන බව ද ෆීල්ඩ් මාර්ෂල්වරයා වැඩිදුරටත් සඳහන් කර සිටිනවා.
ෆීල්ඩ් මාර්ෂල් සරත් ෆොන්සේකා යනු මෙරට 33 වසරක් මුළුල්ලේ පැවති එල්. ටී. ටී. ඊ. යුද්ධය පරාජයට පත් කිරීමට උරදුන් සෙන්පතියෙකු වන අතර හෙතෙම 2009 වර්ෂයේ හිටපු ජනාධිපති මහින්ද රාජපක්ෂ සමග කරට කර ජනාධිපතිවරණයට ද එක් වුණා.
