ටියුනීසියානු වෙරළට ඔබ්බෙන් වන මුහුදු ප්‍රදේශයේදී සංක්‍රමණිකයන් රැගත් යාත්‍රාවක් අනතුරට ලක්වීමෙන් ළමුන් සහ ළදරුවන් ඇතුළු 34 දෙනෙකු අතුරුදහන් වී තිබෙනවා.
එය දින දෙකක් ඇතුලත ගිලී ගිය පස්වන සංක්‍රමණික යාත්‍රාව වන අතර, මේ වන විට පුද්ගලයින් හත් දෙනෙකු මිය ගොස් ඇති බවට තහවුරු වී ඇති අතර 67 දෙනෙකු තවමත් අතුරුදහන් බවයි විදෙස් මාධ්‍ය වාර්තා කළේ.
අද අනතුරට ලක්වූ බෝට්ටුව ඉතාලිය බලා යමින් තිබූ බවටයි ටියුනීසියා බලධාරීන් විශ්වාසය පළ කරන්නේ.
ටියුනීසියානු වෙරළාරක්ෂක භටයින් පසුගිය දින දෙක තුළ ඉතාලිය බලා පිටත්ව ගිය බෝට්ටු 56ක් සිය භාරයට ගෙන ඇති බව වාර්තා වනවා.
ටියුනීසියානු ජාතික ආරක්ෂක බළකායේ Houssem Jebabli පැවසුවේ රට හැර යාමට උත්සාහ කළ සංක්‍රමණිකයන් 3,000කට වැඩි පිරිසක් රඳවාගෙන ඇති බවයි.
යුරෝපයට යන සංක්‍රමණිකයන් තම ගමන් ආරම්භ කරන ප්‍රධාන මධ්‍යස්ථානයක් බවට ටියුනීසියාව පත්ව තිබෙනවා.
එක්සත් ජාතීන්ගේ සංවිධාන දත්ත පෙන්වා දෙන්නේ මේ වසරේ ඉතාලියට පැමිණි සංක්‍රමණිකයන් 12,000ක් ටියුනීසියාව හරහා පැමිණ ඇති අතර පසුගිය වසරේ එම කාල සීමාව තුළ පැමිණ ඇත්තේ 1,300ක පමණ පිරිසක් බවයි.
ටියුනීසියාවේ දේශපාලන හා ආර්ථික තත්වය ස්ථාවර නොවන්නේ නම් යුරෝපය දෙසට සංක්‍රමණ රැල්ලක් ඇති විය හැකි බව සිකුරාදා බ්‍රසල්ස් හි පැවති සමුළුවකදී අදහස් දක්වමින් ඉතාලියේ අගමැති ජෝජියා මෙලෝනි අනතුරු අඟවා තිබෙනවා.
ජාත්‍යන්තර මූල්‍ය අරමුදල (IMF) සමඟ ණයක් ලබා ගැනීමේ සාකච්ඡා ඇනහිටීමෙන් පසු ටියුනීසියාව මේ වන විට දරුණුතම මූල්‍ය අර්බුදයකට මුහුණ දී සිටිනවා.
එක්සත් ජනපද රාජ්‍ය ලේකම් ඇන්ටනි බ්ලින්කන් ද ප්‍රකාශ කර ඇත්තේ ටියුනීසියාව මුල්‍ය අරමුදල සමග ණය දීමේ ගනුදෙනුවකට ඉක්මනින් එළඹිය යුතු බවයි.
2021 ජූලි මාසයේ සිට ටියුනීසියාව ද සැලකිය යුතු දේශපාලන අභියෝගවලට මුහුණ දී තිබෙනවා.
