‘ශාන් පුතා’ නමැත්තාට එරෙහිව මාතර මහෙස්ත්‍රාත් අධිකරණය පනවා ඇති විදෙස් ගමන් තහනම යළිත් වතාවක් ඉවත් කර දෙන ලෙස කළ ඉල්ලීම පිළිගත් මාතර මහෙස්ත්‍රාත් අරුණ ඉන්ද්‍රජිත් බුද්ධදාස මහතා 2025 වර්ෂයේ ඔක්තෝම්බර් මස 31 වන දින දක්වා කාලයකට විදෙස් ගමන් තහනම ඉවත් කිරීමට නියෝග කර තිබෙනවා.
ජ්‍යේෂ්ඨ නීතිඥ දසරාජ් දහනායක මහතා විසින් ගොනු කරන ලද මෝසමක් මාර්ගයෙන් බීආර්1628/25 දරණ නඩුව සඳහා මාතර මහේස්ත්‍රාත් අධිකරණයට අද (16) කරුණු දක්වමින් නීතිඥවරයා සඳහන් කළේ ශාන් පුතාට විදෙස් ප්‍රසංග සඳහා විදෙස්ගත වීමට ඇති බැවින් ඒ සඳහා අධිකරණයේ අවධානය යොමු කර එම තහනම ඉවත් කර දෙන මෙන් ඉල්ලා සිටි බවයි.
ශාන් පුතා වෙනුවෙන් ජ්‍යේෂ්ඨ නීතිඥ දසරාජ් දහනායක මහතා සමඟ නීතිඥ ලයාන් ඉරංග හේවා යද්දෙහිගේ මහතා පෙනී සිටියා.
ඒ අනුව එහිදී ඉදිරිපත් වු කරුණු සලකා බැලු මහේස්ත්‍රාත් අරුණ ඉන්ද්‍රජිත් බුද්ධදාස මහතා ශාන් පුතාගේ විදේශ ගමන් තහනම මැයි මස 16 දින සිට ඔක්තෝම්බර් මස 31 වන දින දක්වා අවලංගු කරන බවත්, ඒ බව ෆැක්ස් මඟින් ආගමන විගමන පාලක වෙත දන්වා යවන ලෙසත් නියෝග කළා.
