ජනපති ධුරයේ කටයුතු කිරීමේ දී සිදු කරන ලද ප්‍රධාන නිල ක්‍රියාවන් සඳහා නඩු පැවරීමේ හැකියාවෙන් හිටපු ජනාධිපතිවරුන්ට මුක්තියක් ඇති බවට තීන්දු කරමින් අමෙරිකානු ශ්‍රේෂ්ඨාධිකරණය ලබා දුන් තීන්දුව ජනාධිපති ජෝ බයිඩන් හෙළා දැක තිබෙනවා.
පසුගිය සඳුදා ලබා දුන් මෙම තීන්දුවත් සමග මෙවර ජනාධිපතිවරණයට සටන් වදින ඩොනල්ඩ් ට්‍රම්ප් හට දෙවැනි වරටත් ඇමෙරිකානු ජනපති අසුනේ අසුන් ගැනීමට වැඩි අවස්ථාවන් විවර වී ඇති බවයි දේශපාලන විශ්ලේෂකයින් සඳහන් කරන්නේ.
කෙසේ වෙතත් මේ සම්බන්ධයෙන් දැඩි අදහස් දැක්වීමක් සිදුකළ ජනාධිපති ජෝ බයිඩන් කියා සිටියේ
“ඇමරිකාවේ රජවරු නැහැ. අපි හැමෝම නීතිය ඉදිරියේ සමානයි. කිසිවෙක්, කිසිවෙක් නීතියට ඉහළින් නැත, එක්සත් ජනපදයේ ජනාධිපතිවරයා පවා එසේ නොවේ, යනුවෙන්.
ශ්‍රේෂ්ඨාධිකරණය පසුගිය දා සිය තීන්දුව ලබා දෙමින් සඳහන් කළේ, හිටපු ජනපති ට්‍රම්ප් ජනාධිපති
ධුරයෙන් ඉවත් වීමට පෙර ගත් සමහර ක්‍රියාවන් සඳහා අපරාධ නඩු පැවරීමෙන් මුක්තිය ඉල්ලා සිටිය හැකි බවයි.
