ශ්‍රී ලාංකික බිළිඳුන් විදේශිකයන්ට දරුකමට හදා ගැනීම සඳහා විකිණීමේ සංවිධානාත්මක කල්ලියක් සම්බන්ධයෙන් අපරාධ පරීක්ෂණ දෙපාර්තමේන්තුව (CID) විමර්ශන ආරම්භ කර තිබෙනවා.
මේ සම්බන්ධයෙන් අපරාධ පරීක්ෂණ දෙපාර්තමේන්තුව ඊයේ (23) කොළඹ ප්‍රධාන මහේස්ත්‍රාත් ප්‍රසන්න අල්විස් මහතාට දැනුම් දී ඇති බවයි වාර්තා වන්නේ.
මහනුවර ප්‍රදේශයේ සිට මෙම මහා පරිමාණ ළදරු ජාවාරම මෙහෙයවන්නේ සංවිධානාත්මක අපරාධකරුවන් බව රහස් පොලිසිය අධිකරණයට කරුණු ඉදිරිපත් කරමින් අනාවරණය කළ අතර ඒ සම්බන්ධයෙන් විමර්ශනයක් ද ආරම්භ කර තිබෙනවා.
මෙම මිනිස් ජාවාරම සම්බන්ධයෙන් ශ්‍රී ලාංකික සම්භවයක් ඇති නෝර්වේ පුරවැසියෙකුගෙන් පැමිණිල්ලක් ලැබී ඇති බවයි අපරාධ පරීක්ෂණ දෙපාර්තමේන්තුව අධිකරණය හමුවේ ප්‍රකාශ කළේ.
කරුණු සලකා බැලූ කොළඹ ප්‍රධාන මහේස්ත්‍රාත්වරයා අපරාධ පරීක්ෂණ දෙපාර්තමේන්තුවට නියෝග කර ඇත්තේ වහාම පරීක්ෂණයක් පවත්වා ජාවාරමට සම්බන්ධ සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙසයි.
පොලිසිය නිවේදනය කළේ ශ්‍රී ලාංකික ළමයින් මැලේසියාව හරහා වෙනත් රටවලට යැවීමේ ජාවාරමක් සිදුවෙමින් පවතින බවට ආගමන විගමන දෙපාර්තමේන්තුවේ පාලක ජනරාල්වරයා විසින් අපරාධ පරීක්ෂණ දෙපාර්තමේන්තුවට දැනුම්දීමක් කර තිබු බවයි.
ඒ අපරාධ පරීක්ෂණ දෙපාර්තමේන්තුවේ තැනැත්තන් වෙළඳාම ජාවාරම් විමර්ශන හා සමුද්‍රීය අපරාධ විමර්ශන කොට්ඨාශයටයි.
සිදු කරන ලද විමර්ශනයේදී උතුරු නැගෙනහිර ප්‍රදේශවල පදිංචි වයස අවුරුදු 18ට අඩු දමිළ ළමයින් මැලේසියාව වෙත යවන බවට හඳුනාගෙන තිබෙනවා.
මෙරටින් මැලේසියාවට යාම සඳහා මෙම ළමයින්ට නිත්‍යානුකූල විදේශ ගමන් බලපත්‍රයක් භාවිත කරන අතර මැලේසියාවේදී ව්‍යාජ ගමන් බලපත්‍ර සකස් කර ප්‍රංශය, බ්‍රිතාන්‍ය වැනි රටවල් වෙත යොමු කරන බවටයි හෙළිවී ඇත්තේ.
මේ ආකාරයට මේ වන විට මෙරටින් ළමයින් 13 දෙනෙකු පමණ මැලේසියාවට පිටත් කර යවා ඇති බව ද සඳහන්.
මේ සඳහා අතරමැදි ජාවාරම්කරුවෙකු සම්බන්ධ වී සිටින බවට ද පොලිසිය තොරතුරු අනාවරණ කරගෙන තිබෙනවා.
සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුවේ තැනැත්තන් වෙළඳාම ජාවාරම් විමර්ශන හා සමුද්‍රීය අපරාධ විමර්ශන කොට්ඨාශ වැඩිදුර විමර්ශන සිදු කරනවා.
