ශ්‍රීලංකන් ගුවන් සේවය විශේෂ නිවේදනයක් නිකුත් කරමින් සමාව අයදීයි

අද (25) අලුයම කටුනායක ගුවන් තොටුපළේ සිදු වූ ප්‍රමාදයන් සම්බන්ධයෙන් ශ්‍රීලංකන් ගුවන් සේවය විශේෂ නිවේදනයක් නිකුත්කර තිබෙනවා.

ඒ, අනුව එම සමාගම සඳහන් කළේ ශ්‍රීලංකන් ගුවන් සමාගම මඟින් ක්‍රියාත්මක කරනු ලබන පිරික්සුම් කවුන්ටරවල (Check-in counter) සිදුවු ප්‍රමාදයන් තාවකාලික, සැලසුම් නොකළ මෙහෙයුම් තත්ත්වයන් නිසා සිදු වූවක් බවයි.

මෙය කිසිඳු ආකාරයක වෘත්තීය සමිති ක්‍රියාමාර්ගයක් හේතුවෙන් සිදුවූවක් නොවන බවයි ශ්‍රීලංකන් ගුවන් සමාගම දන්වා සිටින්නේ.

මේ වනවිට ඇතුල්වීමේ කවුන්ටර මෙහෙයුම් (Check-in counter operations) සාමාන්‍ය තත්ත්වයට පත්ව ඇති අතර, මෙම මෙහෙයුම් ප්‍රමාදයන් නිසා අපහසුතාවයට පත් වූ සිය ගුවන් මගීන්ගෙන් ශ්‍රී ලංකන් ගුවන් සමාගම සමාව අයැද සිටිනවා.

මේ අතර අද (25) උදෑසන දසත නිව්ස් වෙත වාර්තා වුණේ ගුවන් තොටුපළ කාර්ය මණ්ඩලය සිය රාජකාරී කටයුතු කිහිපයකින් ඉවත් වී ඇති බවයි.

ඒ හේතුවෙන් අද (25) උදෑසන ශ්‍රී ලංකන් ගුවන් සේවයේ ගුවන් ගමන් වාර 04ක් ප්‍රමාද වී ඇති බව ද වාර්තා වුණා.

කෙසේ වෙතත් මේ වනවිට එම වැඩ වර්ජන ක්‍රියාමාර්ගය අවසන් කිරීමට එම සේවකයින් කටයුතු කර තිබෙනවා.

ශ්‍රීලංකන් ගුවන් සේවයේ පවතින අකාර්යක්ෂමතාවයන්ට කඩිනමින් විසඳුම් ඉල්ලා ගුවන් තොටුපළ කාර්ය මණ්ඩලය මෙම වැඩවර්ජනය ආරම්භකර තිබුණා.

ශ්‍රී ලන්කන් ගුවන් සේවයේ ශ්‍රී ලංකා නිදහස් සේවක සංගමයේ සභාපති ජනක විජයපතිරත්න සඳහන් කළේ ශ්‍රී ලන්කන් ගුවන් සේවයේ ගුවන් ගමන් නිරන්තරයෙන් ප්‍රමාද වීම සහ අවලංගු වීම හේතුවෙන් කටුනායක ගුවන් තොටුපොළ වෙත පැමිණෙන ගුවන් මගීන් විසින් සේවකයින්ට පරුෂ වචනයෙන් පවා බැන වැදීම් සිදුකරනු ලබන බවයි.

අද උදෑසන ක්‍රියාත්මක කළ වැඩ වර්ජනයට මෙම තත්ත්වයන් ද හේතු වූ බවයි සභාපතිවරයා සඳහන් කළේ.