මත්ද්‍රව්‍ය ජාවාරම්කරුවන් සහ අපරාධකරුවන් අත්අඩංගුවට ගැනීම වෙනුවෙන් දිවයින පුරා ක්‍රියාත්මක වන යුක්ති මෙහෙයුම දින කිහිපයක් තාවකාලිකව නතර කිරීමට සිදුවී ඇතැයි පොලිසිය පවසනවා.
පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව මහතා අද පැවති මාධ්‍ය හමුවකට එක්වෙමින් සඳහන් කළේ 24, 25 සහ 26 දිනවල මෙම විශේෂ මෙහෙයුම තාවකාලිකව නතර වන බවයි.
මේවන විට සියලුම පොලිස් ස්ථානවල නිලධාරීන් විශාල පිරිසක් ජාවාරම්කරුවන් අත්අඩංගුවට ගැනීමේ මෙහෙයුම්වල නිරතවන අතර එම නිලධාරීන්ට නත්තල් දින දෙකෙහි සහ පොහොය දිනයේ දේවස්ථාන ආරක්ෂාව වැනි ආරක්ෂක කටයුතු වෙනුවෙන් ද කටයුතු කිරීමට සිදුවී තිබීම මීට හේතුවයි.
එමෙන්ම උත්සව සමයේ මාර්ගවල රාජකාරී කටයුතු කිරීමට වැඩි වගකීමක් රථ වාහන අංශ භාර පොලිස් නිලධාරීන්ට පැවරී තිබීම ද හේතුවක් බවයි පොලිස් මාධ්‍ය ප්‍රකාශකවරයා පෙන්වා දුන්නේ.
මෙම දිනවල යුක්ති මෙහෙයුම අඩු කිරීමක් පමණක් සිදු වන අතර සම්පූර්ණයෙන් නතර කිරීමක් සිදු නොවන බව ද නිහාල් තල්දූව මහතා අවධාරණය කළා.
මෙය මත්ද්‍රව්‍ය සහ අපරාධකරුවන් අත්අඩංගුවට ගැනීමේ මෙහෙයුම් නතර කිරීමක් නොවන බව ප්‍රකාශ කළ පොලිස් මාධ්‍ය ප්‍රකාශකවරයා පෙන්වා දුන්නේ එලෙස නතර කළ හොත් පසුගිය දිනවල සිදු කළ සාර්ථක මෙහෙයුම්වලින් ප්‍රතිඵලයක් නොලැබෙන බවයි.
යුක්ති මෙහෙයුම ආරම්භ කරනු ලැබුවේ ද 17 වනදා සිට 23 වනදා දක්වා සතියක කාලයක් සඳහා බව ද ඔහු ප්‍රකාශ කළා.
