වියට්නාමයේ සරණාගත කඳවුරක රඳවා සිටි ශ්‍රී ලාංකිකයන් 152ක් අද යළිත් මෙරටට එවා තිබෙනවා.
අප ගුවන් තොටුපල වාර්තාකරුවන් සඳහන් කළේ අලුයම විශේෂ ගුවන් යානයකින් මෙම පිරිස කටුනායක ගුවන් තොටුපළ වෙත පැමිණි බවයි.
මීට මාස කිහිපයකට පෙර 400 කට අධික ශ්‍රී ලාංකිකයන් පිරිසක් නීති විරෝධී මුහුදු ගමනක යෙදෙමින් ඕස්ට්‍රේලියාව බලා ගමන් ගනිමින් සිටියදී, ඔවුන් ගමන් ගත් යාත්‍රාව වියට්නාමය ආසන්න මුහුදු සීමාවේදී අනතුරකට පත්ව තිබුණා.
එහිදී වියට්නාම් වෙරළාරක්ෂක භටයින් විසින් මෙම යාත්‍රාවේ සිටි පිරිස බේරා ගෙන එරට හැනෝයි නගරය ආසන්න කඳවුරකයි රඳවා තබා තිබුණේ.
මෙම තොරතුරු හෙළිවීමෙන් අනතුරුව ශ්‍රී ලංකාවේ ආගමන හා විගමන දෙපාර්තමේන්තු නිලධාරීන් පිරිසක් වියට්නාමය වෙත ගොස් විමර්ශන ආරම්භ කර තිබූ අතර, එහිදී යළිත් ශ්‍රී ලංකාවට පැමිණීමට එකඟ වූ ශ්‍රී ලාංකිකයන් 152 දෙනෙකු අද මෙලෙස තාවකාලික ගුවන් ගමන් බලපත්‍ර සකස් කර ශ්‍රී ලංකාවට ගෙන්වා ගනු ලැබුවේ.
දිවයිනට පැමිණි මෙම ශ්‍රී ලාංකිකයන් 152 දෙනා අතරින් 09 දෙනෙකු කාන්තාවන් වන අතර ඉතිරි 144 දෙනා පිරිමි පුද්ගලයන්.
ඔවුන් අද දින අලුයම වියට්නාමයේ යන් ගොන් (Yan Gon) ගුවන් තොටුපළේ සිට ෆිට්ස් එයා ගුවන් සේවයේ විශේෂ ගුවන් යානයෙන් කටුනායක ගුවන් තොටුපළ වෙත එවා තිබුණා.
මෙම පිරිස කටුනායක ගුවන් තොටුපළේ දී ආගමන විගමන දෙපාර්තමේන්තු නිලධාරීන් විසින් භාර ගැනීමෙන් පසුව කොළඹ සිට පැමිණි තැනැත්තන් වෙළෙඳාම සහ සමුද්‍රීය අපරාධ විමර්ශන කොට්ඨාසයේ නිලධාරීන් පිරිසක් විසින් අත් අඩංගුවට ගෙන කටුනායක ගුවන් තොටුපළ තුළ රඳවා ගෙන ඔවුන්ගෙන් ප්‍රකාශ සටහන් කර ගනිමින් විශේෂ විමර්ශනයක් ආරම්භ කර තිබෙනවා.
