ස්පාඤ්ඤයේ කාලෝස් අල්කරාස් විම්බල්ඩන් කිරුළ රැකගනී (ඡායාරූප)

විම්බල්ඩන් පිරිමි කේවල අවසන් මහා තරගය ජයගැනීමට ස්පාඤ්ඤයේ කාලෝස් අල්කරාස්ට ඊයේ (13) හැකියාව ලැබුණා.

ඒ, අවසන් මහා තරගයේ දී සුපිරි ටෙනිස් ක්‍රීඩක සර්බියාවේ නොවැක් ජොකොවික් පරාජය කරමින්.

අවසන් මහා තරගයේ ලකුණු සටහන දැක්වුණේ 6-2 6-2 7-6 (7-4)ක් ලෙසයි.

21 වන වියේ පසුවන කාලෝස් අල්කරාස් මෙලෙස දිනාගත්තේ සිව්වන ග්‍රෑන්ඩ් ස්ලෑම් ශූරතාව වීම ද විශේෂත්වයක්.

මේ අතර කාලෝස් අල්කරාස් වාර්තා අතර එක්වන්නේ විම්බල්ඩන් කිරුළ සාර්ථකව රැකගත් පළමු ස්පාඤ්ඤ ජාතිකයා බවට පත් වෙමින්.

හිටපු සුපිරි ටෙනිස් ක්‍රීඩකයෙක්වන ස්පාඤ්ඤයේ රෆායල් නඩාල්ට පවා එවැනි දස්කමක් දැක්වීමට හැකියාව ලැබී නැහැ.

අල්කරාස් මේ වනවිට වත්මන් ප්‍රංශ විවෘත සහ විම්බල්ඩන් ශූරයාවන අතර, මෙම යුගයේ තරඟාවලි දෙකම ජයග්‍රහණය කළ හයවන පුද්ගලයා බවට ද ඔහු පත්වනවා.

මේ අතර ශූරතාව හිමිකරගත් ස්පාඤ්ඤයේ කාලෝස් අල්කරාස්ට හිමි විම්බල්ඩන් කුසලානය පිරිනැමීම වේල්ස් හි කුමරියවන කේට් කුමරිය අතින් සිදුකෙරුණා.

37 හැවිරිදි ජොකොවික් සහ යොවුන් ක්‍රීඩක කාලෝස් අතර ඊයේ පැවති මෙම අවසන් මහා තරගය නැරඹීම වෙනුවෙන් අඩුම ප්‍රවේශපත්‍රය ඇමරිකානු ඩොලර් 10,000ක මිලකට අලෙවි වූ බවයි විදෙස් මාධ්‍ය වාර්තා කළේ.