ශ්රේෂ්ඨාධිකරණ නියෝගයක් ආචාර ධර්ම සහ වරප්රසාද පිළිබඳ පාර්ලිමේන්තු කාරක සභාවට යොමු කිරීමට ගත් පියවර ශ්රී ලංකා නීතිඥ සංගමය (BASL) හෙළා දකිනවා.
පළාත් පාලන මැතිවරණය සඳහා මුදල් නිදහස් කරන ලෙස බලධාරීන්ට බලකරමින් ශ්රේෂ්ඨාධිකරණය ලබාදුන් නියෝගය මෙලෙස පාර්ලිමේන්තු ආචාර ධර්ම සහ වරප්රසාද පිළිබඳ කාරක සභාව වෙත යොමු කර ඇති බවටයි වාර්තා වන්නේ.
නිවේදනයක් නිකුත් කරමින් නීතිඥ සංගමය අනාවරණ කළේ ශ්රේෂ්ඨාධිකරණ නියෝගයෙන් පාර්ලිමේන්තුවේ බලතල සහ වරප්රසාද උල්ලංඝනය වී නොමැති බවයි.
ශ්රේෂ්ඨාධිකරණය ස්වාධීන ආයතනයක් වන අතර අධිකරණ නියෝග වෙනත් කිසිදු පුද්ගලයෙකුට හෝ ආයතනයකට පැහැදිලි කිරීම සඳහා කැඳවිය යුතු නැති බව ද එහි වැඩිදුරටත් සඳහන්.
අධිකරණ ක්රියාවලියට සිදුවන ඕනෑම මැදිහත්වීමක් භයානක පූර්වාදර්ශයක් සපයන බවත් එය දැඩි ලෙස හෙළා දැකිය යුතු බවත් නීතිඥ සංගමය අනතුරු අඟවනවා.
මේ අතර යෝජිත ත්රස්ත විරෝධි පනත් කෙටුම්පත සමාලෝචනය සඳහා ජ්යේෂ්ඨ නීතිඥවරුන්ගෙන් සමන්විත කමිටුවක් පත්කළ බව ශ්රී ලංකා නීතිඥ සංගමය පවසනවා.
එම සංගමය වැඩිදුරටත් පෙන්වා දී ඇත්තේ අදාළ පනත ඉදිරිපත් කර ඇත්තේ ප්රමාණවත් උපදේශනයකින් තොරව බවයි.
මේ අතර ආණ්ඩුක්රම ව්යවස්ථාව හරහා සම්මත කර ඇති පුරවැසි අයිතිවාසිකම් සෘජුව හෝ වක්රව කප්පාදු කිරීමට හෝ යටපත් කිරීමට කිසිදු නීති සම්පාදනයක් නොකළ යුතු බවද එම සංගමය පවසනවා.
එසේම මෙය නීතියක් ලෙස සම්මත වුවහොත් එමගින් දුරදිග යන ප්රතිඵල ඇතිවිය හැකි බවයි ශ්රී ලංකා නීතිඥ සංගමය පෙන්වා දී ඇත්තේ.
