විදේශ මුදල් ව්‍යාපෘති 179න් සාධනීය මට්ටමක පවතින්නේ ව්‍යාපෘති 31 පමණක් බවත්; එම ව්‍යාපෘතිවල ප්‍රගතිය ගැන වාර්තාවක් ඉක්මනින් ලබාදෙන ලෙසත් කාරක ව්‍යාපෘති කළමනාකරණ සහ අධීක්ෂණ දෙපාර්තමේන්තු නිලධාරීන් හට උපදෙස් ලැබී තිබෙනවා.
විදේශ අරමුදල් සපයනු ලබන ආයතනවලින් විදේශ මුදල් ව්‍යාපෘති සඳහා ආසන්න වශයෙන් රුපියල් ට්‍රිලියන 2.6 මුදලක් ලැබී ඇති බවට ද මෙම කාරක සභා අවස්ථාවේ දී හෙළි වුණා.
කාර්ය සාධන වාර්තා 4ක් සහ වාර්ෂික වාර්තා 3ක් සඳහා ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාවේ දී මෙම කාරනා සඳහා අනුමැතිය ද හිමි වූ බවයි වාර්තා වන්නේ.
ව්‍යාපෘති කළමනාකරණ සහ අධීක්ෂණ දෙපාර්තමේන්තුවේ කාර්ය සාධන වාර්තාව සලකා බලනු ලැබූ අවස්ථාවේ දී විදේශ මුදල් ව්‍යාපෘති පිළිබඳ ව සාකච්ඡාවට බඳුන් වූ අතර, එහිදී විදේශ මුදල් ව්‍යාපෘති 179ක් අතරින් සාධනීය මට්ටමක පවතින්නේ ව්‍යාපෘති 31 පමණක් බවටයි අනාවරණය වූයේ.
මේ පිළිබඳ විමසා බැලීම සිදු වූයේ ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාව පාර්ලිමේන්තු මන්ත්‍රී මහින්දානන්ද අලුත්ගමගේ මහතාගේ සභාපතිත්වයෙන් පාර්ලිමේන්තුවේදී යි.
විදේශ අරමුදල් සපයනු ලබන ආයතනවලින් විදේශ මුදල් ව්‍යාපෘති සඳහා ආසන්න වශයෙන් රු. ට්‍රිලියන 2.6 මුදලක් ලැබී ඇති බවට මෙහිදී අනාවරණය වූ අතර මෙම ව්‍යාපෘති මගින් රටේ ප්‍රාග්ධන වියදම් සඳහා ලබා ගන්නා විදේශ ණය සහ ප්‍රදාන අදාළ ව්‍යාපෘති තුළින් අපේක්ෂිත ප්‍රතිඵල ලබා ගැනීමට නිසි ලෙස සැලසුම් ක්‍රියාත්මක නොකිරීම ඉතා කනගාටුදායක බව කාරක සභාව පැවසුවා.
මෙම ව්‍යාපෘති තුළින් අපේක්ෂිත අරමුණු ඉටුකර නොගන්නා බවත්, රටේ විදේශ ණය ශීඝ්‍රයෙන් ඉහළ යන බවත් කාරක සභාව පෙන්වා දුන්නා.
අදාළ අමාත්‍යංශවල, එහි ක්‍රියාත්මක ආයතන මෙන් ම මෙම ව්‍යාපෘති ක්‍රියාත්මක කිරීම සඳහා පිහිටුවා ඇති ව්‍යාපෘති අධීක්ෂණ ඒකකවල දුර්වලතාවයන් මේ සඳහා හේතු වී ඇති බවයි කාරක සභාව මෙහිදී දැනුම්දුන්නේ.
මේ සම්බන්ධයෙන් වාර්තාවක් මාසයක් ඇතුළත ලබාදෙන ලෙස නිලධාරීන් හට කාරක සභාව විසින් උපදෙස් ලබා දෙමින් ව්‍යාපෘති කළමනාකරණ සහ අධීක්ෂණ දෙපාර්තමේන්තුවේ කාර්ය සාධන වාර්තාව සඳහා අනුමැතිය ලබා දුන් බවයි පාර්ලිමේන්තු සන්නිවේදන අංශය නිවේදනය කළේ.
