දිවයිනට ම බලපා ඇති බෙංගාල බොක්ක ප්‍රදේශයේ අවපීඩන කලාපයක් වර්ධනය වීම හේතුවෙන් ඇදහැලෙන ධාරාණිපාත වර්ෂාව මත මේ වනවිට (27) වික්ටෝරියා ජලාශයේ වාන් දොරටු සියල්ල ම විවෘත කර තිබෙනවා.
ඒ අනුව අද පස්වරුවේ ජලාශය භාර ඉංජිනේරුවරුන් විසින් ජලාශයේ වාන් දොරටු 08 ම විවෘත කිරීමට කටයුතු කළ බවයි වාර්තා වන්නේ.
මහවැලි සංවර්ධන අධිකාරිය නිවේදනයක් නිකුත් කරමින් සඳහන් කරන්නේ; වික්ටෝරියා ජලාශයට අමතරව බෝවතැන්න, දඹුළු ඔය, කලාවැව, රන්ටැඹේ, ලොග්ගල් ඔය ජලාශ මේ වනවිටත් වාන් දැමීම ආරම්භ කර ඇති බවයි.
මහවැලි ගඟේ ඉහළ ජල පෝෂිත ප්‍රදේශයට ඇදහැලෙන වර්ෂාපතනය අනුව කොත්මලේ ද වාන් දැමීම ආරම්භ කර තිබෙනවා.
මෙම අයහපත් කාලගුණික තත්ත්වය තවදුරටත් පැවතියහොත් රන්දෙණිගල ජලාශය වාන් දැමීම සිදු වන බවත් රන්ටැඹේ හා මිණිපේ අමුණ හරහා මහවැලියට මුදා හරින ජල ප්‍රවාහය වැඩි වන බැවින් ඒ අවට පහත් බිම්වල වෙසෙන ජනතාව දැඩි අවධානයෙන් පසුවන ලෙසට ද මහවැලි සංවර්ධන අධිකාරියේ ජලාශ භාර පර්‍යේෂණ මෙහෙයුම් අධ්‍යක්ෂ ඩී. එම්. ධර්මදාස මහතා දැනුම්දෙන්නේ.
එමෙන්ම නුවරඑළිය නගර සීමාවට තවදුරටත් ඇද හැලෙන අධික වර්ෂාව හේතුවෙන් කොත්මලේ ජලාශයට ජලය ගලා බසින තලගලඔය පිටාර ගැලීම ආරම්භ කර තිබෙනවා.
මේ හේතුවෙන් නුවරඑළිය මහ නගර සභාව යටතේ පාලනය වන වික්ටොරියා උද්‍යානය, ගිනි නිවීමේ සහ ගලවා ගැනීමේ ඒකකය ද අද දහවල් වනවිට සම්පූර්ණයෙන් ජලයෙන් යට වී ඇති අයුරුයි දක්නට ලැබුණේ.
මේ අතර නිරිතදිග බෙංගාල බොක්ක ප්‍රදේශයේ පවතින ගැඹුරු පීඩන අවපාතය සම්බන්ධයෙන් ද අද පස්වරුවේ කාලගුණ විද්‍යා දෙපාර්තමේන්තුව විශේෂ නිවේදනයක් නිකුත් කර තිබෙනවා.
එහි දැක්වෙන්නේ අද දහවල් 11.30 පමණ වන විට ත්‍රිකුණාමලයට කිලෝමීටර් 110ක් පමණ දුරින් නැගෙනහිර දෙසට බරව අදාළ අවපීඩන වර්ධනය ස්ථානගත වී තිබූ බවයි.
එබැවින් දිවයිනේ නැගෙනහිර වෙරළට ආසන්නව ගමන් කරන තද සුළං ප්‍රවාහය අද දිනයේ ඉදිරි පැය 06 තුළ සුළු කුණාටුවක් දක්වා තවදුරටත් තීව්‍ර විය හැකි බවත් සඳහන් වනවා.
