ගලෙන්බිදුණුවැව කුරුණෑගල කොළණිය ප්‍රදේශයේ නිවසක් පිටුපස පැරණි වැව් බැම්මක නිධන් හාරමින් සිටි පුද්ගලයන් 6 දෙනෙකු පොලිස් අත්අඩංගුවට ගෙන තිබෙනවා.
පිරිසක් විසින් නිවසක් පිටුපස කැණීම් සිදුකරන බවට ලැබුණු බුද්ධි තොරතුරක් මත අද සවස 3ට පමණ කළ වැටලීමකදී යි මෙම පිරිස අත්අඩංගුවට ගෙන ඇත්තේ.
ඔවුන් ගලෙන්බිදුණුවැව පඬිකාරමඩුව ප්‍රදේශයේම පදිංචි අවුරුදු 45ත් 50ත් අතර පසුවන්නන් බව සඳහන්.
සැකකරුවන්ගෙන් එක් අයෙකුගේ නිවසේ ගෙවත්ත එම වැව් බැම්ම අසල පිහිටා ඇති අතර ඔහු යන්ත්‍ර මන්ත්‍ර සම්බන්ධයෙන් දැනුමක් ඇති පේන කියන්නෙකු බවත් පොලිසිය සඳහන් කළා.
එම පුද්ගලයා විසින් අනෙක් සැකකරුවන් මෙහෙයවා මෙම වැව් බැම්ම හාරා ඇති බවටයි හෙළිවී ඇත්තේ.
වැටලීම සඳහා පොලිසිය එම ස්ථානයට යන විට සැකකරුවන් අඩි 6ක පමණ ගැඹුරට වළ හාරා පස් අදිමින් සිටි බව නිලධාරීන් ප්‍රකාශ කර තිබෙනවා.
සැකකරුවන් සතුව තිබූ තිබූ ගැඹුරක සිට පස් ඇදීමට භාවිතා කරන යන්ත්‍රයක්, සවල් දෙකක්, උදළු දෙකක්, ඉනිමගක් සහ වයර් ඇතුළු උපකරණ රැසක් ද පොලිස් භාරයට ගැනුණා.
සැකකරුවන් හෙට (04) කහටගස්දිගිලිය මහේස්ත්‍රාත් අධිකරණයට ඉදිරිපත් කිරීමට නියමිත අතර ගලෙන්බිදුණුවැව පොලිසිය ඉදිරි පරීක්ෂණ සිදු කරනවා.
