වැල්ලම්පිටිය, වෙලේවත්ත ප්‍රදේශයේදී පොලිසිය සිදුකළ වෙඩි තැබීමකින් පුද්ගලයෙකු තුවාල ලබා තිබේ.
පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා පැවසුවේ තුවාල ලැබූ සැකකරු රෝහල් ගත කර ඇති අතර ඔහුගේ තත්ත්වය බරපතළ නොවන බවය.
මාස කිහිපයක සිට වැල්ලම්පිටිය, වෙලේවත්ත ප්‍රදේශයේ නිවෙස්වලට පැමිණ රන් මාල කොල්ලකෑමේ සිද්ධීන් කිහිපයක් සම්බන්ධයෙන් වැල්ලම්පිටිය පොලිසිය අද (4) සිදුකළ විශේෂ මෙහෙයුමකදී මෙම වෙඩි තැබීම සිදුව ඇත.
පුද්ගලයින් හතර දෙනෙකුගෙන් සමන්විත කල්ලියක් මගින් මෙම කොල්ලකෑම සිදුකරන බවට අනාවරණ වී ඇති බවත් ඒ අතරින් එක් පුද්ගලයෙකු අත්අඩංගුවට ගැනීමට යෑමේදී සැකකරු දැක්වූ විරෝධතාව මත ඔහුගේ පාදයකට වෙඩි තැබීමට සිදුව ඇති බව පොලිස් මාධ්‍ය ප්‍රකාශකවරයා පැවසීය.
රන්මාල කොල්ලකෑම් 4කට මොහු සම්බන්ධ බවත් මෙම කල්ලියේ අනෙක් සැකකරුවන් තිදෙනා අත්අඩංගුවට ගැනීමට මෙහෙයුමක් ආරම්භ කර ඇති බවත් පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා සඳහන් කළේ ය.
