වර්ජනය අවසන් කළ බව තැපැල් වෘත්තීය සමිති දැනුම්දෙයි

පසුගිය 17 වැනිදා පස්වරු 4.00 සිට ක්‍රියාත්මක කළ අඛණ්ඩ වැඩ වර්ජනය අවසන් කරන බව තැපැල් වෘත්තීය සමිති අද (24) පස්වරුවේ නිවේදනය කළා.

කාබද්ධ තැපැල් වෘත්තීය සමිති පෙරමුණේ සම කැඳවුම්කරු චින්තක බණ්ඩාර මාධ්‍ය වෙත අදහස් දක්වමින් සඳහන් කළේ විෂයභාර අමාත්‍ය නලින්ද ජයතිස්ස සමඟ පැවති සාකච්ඡාවලින් අනතුරුව මෙම තීරණයට එළඹි බවයි.

ඉදිරිපත් කළ මූලික කරුණු 19න් 17කට මසක් ඇතුළත විසඳුම් සැලසුම් කිරීම සඳහා ඇමතිවරයා විසින් තැපැල්පතිට නියෝග ලබා දී ඇති බවත් එම නියෝගය ලිඛිතව භාරදුන් බවත් සම කැඳවුම්කරු චින්තක බණ්ඩා මෙහිදී පැවසුවා.

අනෙක් කරුණු දෙකවන ඇඟිලි සලකුණු සහ අතිකාල දීමනා සම්බන්ධයෙන් වූ ඉල්ලීමට කිසිඳු වෙනසක් සිදුකිරීමට ඇමතිවරයා එකඟතාව පළ නොකළ බවත් ඔහු මෙහිදී සඳහන් කළා.

මේ අනුව ඒ සම්බන්ධයෙන් පවතින නීතිය අනුව ගත හැකි ක්‍රියාමාර්ග ගැන ඉදිරියේ දී සාකච්ඡා කරන බවත් ඔහු වැඩිදුරටත් සඳහන් කර සිටියා.