ඉන්දියාවේ දී ආරම්භ වීමට නියමිත එක්දින ලෝක කුසලානය සඳහා නවසීලන්ත කණ්ඩායම ක්‍රීඩකයින් 15 දෙනෙකුගෙන් යුත් සංචිතයක් මේ වනවිට නම්කර ඇති බව වාර්තා වනවා.
මෙම සංචිතය සඳහා මාස ගණනාවකට පසු කෙන් විලියම්සන් කැඳවා ඇති අතර, සංචිතයේ නායකත්වය ද ඔහුට හිමිව තිබෙනවා.
නිමාවූ ඉන්දීය ප්‍රිමියර් ලීග් තරගාවලියේ ආරම්භයේ දී ආබාධයකට ලක් වූ විලියම්සන්ට මාස ගණනාවක් ක්‍රිකට් පිටියෙන් ඈත්ව සිටීමට සිදු වුණා.
මේ අතර විලියම්සන් සමඟ වේග පන්දු යවන ක්‍රීඩක ටිම් සවුති ද ඔවුන්ගේ සිව්වන ලෝක කුසලානය සඳහා පෙනී සිටීමට නවසීලන්ත සංචිතයට නම්කර තිබෙනවා.
මේ අතර සංචිතයේ එකම කඩුලු රකින්නා ලෙස ටොම් ලේතම් තෝරා ගැනීමත් සමඟ, තරුණ මුල්පෙළ පිතිකරු ෆින් ඇලන්ට හෝ පසුපෙළ පිතිකරුවෙකු හා කඩුලු රකින ක්‍රීඩක ටිම් සෙයිෆර්ට සංචිතයේ ඉඩක් වෙන් නොවීම විශේෂත්වයක්.
එමෙන්ම පසුගියදා නවසීලන්ත එංගලන්ත සංචාරයේ දී මස්පිඬු ආබාධයකට ලක්වූ ඇඩම් මිල්න්ටද මෙම සංචිතයේ ස්ථානයක් අහිමිව තිබෙනවා.
මෙවර ලෝක කුසලාන තරගාවලිය අරඹමින් නවසීලන්තය, එංගලන්තය සමඟ ඔක්තෝම්බර් 05 වනදා තරග බිමට පිවිසීමට නියමිතයි.
නවසීලන්ත සංචිතය,
කේන් විලියම්සන් (නායක), ට්‍රෙන්ට් බෝල්ට්, මාර්ක් චැප්මන්, ඩෙවොන් කොන්වේ, ලොකී ෆර්ගියුසන්, මැට් හෙන්රි, ටොම් ලේතම්, ඩැරල් මිචෙල්, ජිමී නීෂම්, ග්ලෙන් ෆිලිප්ස්, රචින් රවීන්ද්‍ර, මිච් සැන්ට්නර්, ඉෂ් සෝදි, ටිම් සවුති, විල් යන්ග්
