ලෝක ඒඩ්ස් දිනය අදට යෙදී තිබෙනවා.
“අයිතීන් සුරකිමු – ඒඩ්ස් නවතමු” යන්න මෙවර ලෝක ඒඩ්ස් දිනයේ තේමාවයි.
වාර්ෂිකව මෙරටින් HIV ආසාදිතයින් වාර්තා වීම ඉහළ ගොස් ඇති අතර, මෙම වසරේ මුල් මාස 06 තුළ HIV ආසාදිතයින් 421ක් මෙරටින් හඳුනාගෙන ඇති බවයි සෞඛ්‍ය අංශ සඳහන් කළේ.
පසුගිය වසරේ දී වයස අවුරුදු 15ත් 24ත් අතර HIV ආසාදිතයින් 105 දෙනෙකු හඳුනාගෙන ඇති අතර, එය එම වසරේ හඳුනාගත් සමස්ත ආසාදිතයින්ගෙන් 15%ක ප්‍රතිශතයක්.
HIV යනු වෛරසයක් වන අතර, එහි අවසන් තත්ත්වය හඳුන්වන්නේ ඒඩ්ස් ලෙසටයි.
1988 දී ආරම්භ කරන ලද ලෝක ඒඩ්ස් දිනය ගෝලීය සෞඛ්‍ය සඳහා වූ පළමු ජාත්‍යන්තර දිනය ලෙසයි සැලකෙන්නේ.
HIV සම්බන්ධ නිශ්චිත තේමාව ප්‍රවර්ධනය කිරීම සඳහා එක්සත් ජාතීන්ගේ නියෝජිතායතන, රජයන්, සිවිල් සමාජ, එකට එක්ව කටයුතු කරනු ලබනවා.
HIV ආසාදිත පුද්ගලයන්ගේ ජීවන තත්ත්වය ඉහළ නැංවීම සඳහා HIV ආසාදිත පුද්ගලයන්ට සහාය වීමට සහ ඒඩ්ස් ආශ්‍රිත රෝගවලින් මියගිය අයට ශෝකවීමට ජනතාව එක්වන ලෝක ඒඩ්ස් දිනය ඉතා වැදගත් වනවා.
