මෙරට ප්රසිද්ධ විශ්වවිද්යාලයක ආචාර්යවරියක් යැයි පවසන තැනැත්තියක් ඇතුළු තවත් තිදෙනෙකු විසින් නවසීලන්තයේ රැකියා අවස්ථා ලබාදෙන බව පවසා, විවිධ පුද්ගලයන්ගෙන් මුදල් වංචා කර ඇති බවට චෝදනා කරමින්, අසාධාරණයට ලක් වූ පිරිසක් ඊයේ (16) පෙරවරුවේ විදේශ සේවා නියුක්ති කාර්යාංශයට පැමිණිල්ලක් ඉදිරිපත් කිරීම සම්බන්ධයෙන් එම චෝදනාවට ලක් වූ ආචාර්යවරිය විශේෂ ප්රකාශයක් නිකුත් කර තිබෙනවා.
ඇය දසත ප්රවෘත්ති අංශය වෙත සඳහන් කර සිටියේ; මෙම මූල්ය වංචාව ඩුබායි රාජ්යයේ මේ වනවිට (අප්රේල් 17) ජීවත් වන ඩිලාන් යටවර නමැත්තෙකු විසින් වංචනික ලෙස මෙහෙයවන බවයි.
සමාජයේ යම්කිසි විෂයය ක්ෂේත්රයක ගෞරවාදරයට සහ ප්රසිද්ධත්වයට පත් වූ චරිතයක් තෝරා ගනිමින් ඩිලාන් යටවර නමැත්තා විසින් මෙම වංචාව සිදු කර ඇති බවයි ආචාර්ය තියංගි ජයතිලක මහත්මිය පවසන්නේ.
ඩිලාන් යටවර නමින් පෙනී සිටින මෙම තැනැත්තාව ඔහුගේ පර්යේෂණයක් තමන් විසින් සිදු කරනු ලැබීම හේතුවෙන් දැන හැඳුනුම්කමක් තිබූ බවත්, එහෙත් අදාළ ව්යාපෘතිය ගැන තමන් දැනුම්වත් ව සිටිය ද මෙය වංචාවක් බවට නොදැන සිටි බව ද තියංගි ජයතිලක මහත්මිය පවසනවා.
අදාළ සිදුවීම සම්බන්ධයෙන් ජනතාවගෙන් මුදල් එකතු කර ලබාදීමේ දී තමන් අතරමැදියෙක් ලෙස කටයුතු කළ ද ඊට ඉහත ස්ථරය සම්බන්ධයෙන් දැනුම්වත් ව නොසිටි බවයි ඇය වැඩිදුරටත් සඳහන් කරන්නේ.
ඩිලාන් යටවර නමැත්තා විසින් සිය අධ්යාපනික සහ වෘත්තීය සුදුසුකම් මෙම මූල්ය වංචාවට යොදාගෙන ඇති බවට ආචාර්යයවරිය චෝදනා කරනවා.
මෙතුළින් මිනිසුන් සමග තමන් ගොඩනගාගෙන සිටි ප්රතිරූපයට මෙන් ම ගෞරවයට දැඩි හානි එල්ල වීම හේතුවෙන් අදාළ සැකකරුව වහාම අත්අඩංගුවට ගන්නා ලෙස ඉල්ලා අපරාධ පරීක්ෂණ දෙපාර්තමේන්තුවේ ද පැමිණිලි දෙකක් ගොනු කර ඇති බවයි ජයතිලක මහත්මිය සඳහන් කළේ.
මෙම මූල්ය වංචාව චේතනාන්විත ව ඩිලාන් යටවර නමැත්තා විසින් සිදු කර ඇත්තේ අලෙවිකරණය කිරීමට තම තනතුරු – නාම භාවිත කරමින් බවත් මුදල් විශුද්ධීකරණ ක්රියාවලියක අදාළ පුද්ගලයා යෙදී ඇති බවත් ඉන් තමන්ගේ පෞද්ගලික හා වෘත්තීයභාවයට අගතියක් හා අපහාසයක් සිදු වී ඇති බවත් මූල්ය වංචාවට හසු වූ ජනතාවගේ මුදල් යළි ලබා ගැනීමට තමන් නීතිය පාර්ශ්වයෙන් ගත හැකි සෑම ක්රියාමාර්ගයක් ම ගන්නා බව ද ආචාර්ය තියංගි ජයතිලක මහත්මිය කියා සිටියා.
ආචාර්ය තියංගි ජයතිලක, ගයා සංජීව කරුණාතිලක සහ ශිරානි ප්රියදර්ශනී ජයසිංහ යන අය මෙලෙස නවසීලන්තයේ විදේශ රැකියා ලබාදෙන බව පවසා 80 දෙනෙකුගෙන් පමණ මුදල් ලබාගෙන විදේශගත නොකර ඔවුන් මග හරිමින් සිටින බවටයි ඊයේ දින ජාවාරමට හසු වූ පිරිස් විදේශ සේවා නියුක්ති කාර්යාංශයට කරන ලද පැමිණිල්ලේ දැක්වෙන්නේ.
මේ වන විට රුපියල් ලක්ෂ 890ක පමණ මුදලක් මොවුන් වංචා කර ඇති බව විදෙස්ගත වීමට නොහැකි වූ පිරිස් චෝදනා කර සිටිනවා.
ඔවුන් ඉල්ලා සිටින්නේ කඩිනමින් මෙම පිරිස් නීතියට හසුකරගෙන තම මුදල් නැවත ලබාදීමට කටයුතු කරන ලෙසයි.
