ලෝක කුසලාන ක්‍රිකට් තරගාවලියේ ඉන්දියාව සහ ඇෆ්ගනිස්තානය අතර තරගය අද (11) දිල්ලි නුවර අරුන් ජෙට්ලි ක්‍රීඩාංගණයේ දී පැවැත්වීමට නියමිතයි.
මෙම තරගය සඳහා ද ඉන්දීය ආරම්භක පිතිකරු ශුබ්මන් ගිල් එක් නොවන බවයි වාර්තා වන්නේ.
මේ හේතුවෙන් අද තරගයයේදීත් රෝහිත් ශර්මා සමඟ ඉන්දීය ඉනිම ආරම්භ කිරීමේ වගකීම ඉෂාන් කිෂාන්ට හිමිවනු ඇති බවයි තොරතුරු වාර්තා වුණේ.
අසනීප තත්ත්වයක් හේතුවෙන් රෝහල් ගතකර සිටි ගිල් මේ වනවිට චෙන්නායි හි හෝටලයට පැමිණ ඇති බවයි ඉන්දීය මාධ්‍ය වාර්තා කළේ.
ඩෙංගු රෝගය වැළඳීම හේතුවෙන් ශුබ්මන් ගිල් මෙලෙස රෝහල් ගත කිරීමට පසුගිය දා පියවර ගෙන තිබුණා.
මේ අතර ගිල් සම්බන්ධයෙන් ඉන්දීය පිතිකරණ පුහුණුකරු වික්‍රම් රතෝර්ගෙන් මාධ්‍යවේදීන් සිදුකළ ප්‍රශ්න කිරීමේ දී ඔහු සඳහන කළේ ඔහු ඉක්මන් සුවය ලබා යළි කණ්ඩායම සමඟ එක්වනු ඇති බවයි.
එමෙන්ම ඉන්දීය පිතිකරණ ලැයිස්තුව සම්බන්ධයෙන් අදහස් දක්වමින් වික්‍රම් පැවසුවේ මෙවැන්නක්.
“අපිට මේ වන විට ඉතා පළපුරුදු පිතිකරණ ඒකකයක් ඉන්නවා.හැමෝම දන්නවා මේ ආකෘතියේ ක්‍රීඩා කරන්න ඕනේ කොහොම ද කියලා. අපිට මේ වන විට ඉතා ස්ථාවර පිතිකරණ ඒකකයක් තිබෙනවා. සෑම කෙනෙකුටම තමන්ගේම ක්‍රමයක් තිබෙනවා. අපි ඔවුන්ට ක්‍රීඩා කිරීමට අවශ්‍ය ආකාරයට ක්‍රීඩා කිරීමට නිදහස ලබා දෙනවා. නමුත් සෑම කෙනෙකුටම තමන්ගේම ක්‍රීඩා විලාසයක් තියනවා. ඔවුන් ක්‍රීඩා කර ඔවුන්ටම පිටුබලය දෙනවා නම් අපි විශ්වාස කරනවා අපි සාක්ෂාත් කර ගැනීමට බලාපොරොත්තු වන දේ සාක්ෂාත් කර ගන්න ”
