රට වෙනුවෙන් ඩොලර්වලට අමතරව ලක්මවට රන් පදක්කමුත් ගේන ජගත්

කුවේට් රාජ්‍යයේ කායවර්ධන ක්‍රීඩා උපදේශකවරයෙකු වශයෙන් සේවය කර, ශ්‍රී ලංකාව නියෝජනය කරමින් ජාත්‍යන්තර කායවර්ධන ෆෙඩරේෂනයේ (International Federation of Body Building) ඔලිම්පියා ඇමේචර් 2024 යුරෝපා තරගාවලි 03කට සහභාගී වී, මෙම ඔක්තෝබර් මාසය තුළ රන් පදක්කමක්, රිදී පදක්කමක් සහ එම තරගාවලියේ මුල් කාණ්ඩයේ ස්ථාන 02 ක් දිනා ගැනීමට මෙරට කායවර්ධන ක්‍රීඩක ජගත් ගුණසේකර සමත් වී තිබෙනවා.

අප ගුවන්තොටුපොළ වාර්තාකරු පැවසුවේ; මෙම ක්‍රීඩකයා ඉකුත් 12 වැනි දින පෝලන්තයේ වෝර්සෝ නුවර පැවති වෘත්තීය කායවර්ධන ක්‍රීඩකයින්ගේ මාස්ටර් තරගාවලියේ දී රන් පදක්කමක් සහ එම තරගාවලියේ විවෘත “සී” කාණ්ඩය යටතේ තරග කර රිදී පදක්කමක් ද දිනා ගැනීමට සමත් වූ බවයි.

ඊට අමතරව මෙම මස 06 වැනි දින ඉතාලියේ මිලාන් නුවර පැවති ලෝකයේ රටවල් 69 ක ක්‍රීඩකයින් සහභාගී වූ ඔලිම්පියා ඇමේචර් තරගාවලියේ දී මාස්ටර් කාණ්ඩය යටතේ තරග කළ ජගත් ගුණසේකර, එම තරගාවලියේ සිව්වන ස්ථානය දිනා ගැනීමට ද සමත් වුණා.

එසේම 20 වැනි දින හංගේරියාවේ බුඩාපේස්ට් නුවර පැවති, ලෝකයේ රටවල් 44 ක ක්‍රීඩකයින්ගේ සහභාගීත්වයෙන් පැවති වෘත්තීය කායවර්ධන ක්‍රීඩකයින්ගේ මාස්ටර් කාණ්ඩයේ තරගාවලියේ දී ,එහි 05 වැනි ස්ථානය දිනා ගැනීමට ද ඔහු සමත් ව තිබීම විශේෂත්වයක්.