යුක්‍රේනය – රුසියාවට එල්ල කළ ඩ්‍රෝන ප්‍රහාර රැසකින් රුසියානු බලශක්ති බලාගාර දෙකක ගින්නක් හටගෙන තිබෙනවා.
රුසියාවේ ආරක්ෂක අමාත්‍යාංශයට අනුව, යුක්‍රේනියානු ඩ්‍රෝන යානා 158 කට වැඩි ප්‍රමාණයක් මොස්කව් අගනුවර ඇතුළු රටේ ප්‍රදේශ 15ක් ඉලක්ක කර ප්‍රහාර එල්ල කර ඇති බවයි වාර්තා වන්නේ.
රුසියානු හමුදාව කියා සිටින්නේ එම ඩ්‍රෝන යානා විනාශ කළ බවයි.
නමුත් ප්‍රහාරයේ ප්‍රතිඵලයක් ලෙස මොස්කව්හි තෙල් පිරිපහදුවක තාක්ෂණික කාමරයක ගින්නක් හටගෙන ඇති බව එම නගරයේ නගරාධිපතිවරයා පවසනවා.
මේ අතර, රුසියානු අගනුවර සිට සැතපුම් 75 ක් (කිලෝමීටර් 120 ක්) දුරින්, ට්වර් කලාපයේ, කොනකෝවෝ විදුලි බලාගාරයට සමීපව විශාල පිපිරීම් ශබ්දයක් ඇසී තිබුණා.
කොනකොව්ස්කි දිස්ත්‍රික්කයේ ප්‍රහාරයක් නිසා ඇති වූ ගින්න මැඩපවත්වා ඇති බව එම කලාපයේ ආණ්ඩුකාර ඉගෝර් රුඩෙන්යා පවසනවා.
මොස්කව් කලාපයේ කෂිරා බලාගාරයට ඩ්‍රෝන යානා ප්‍රහාරයක් එල්ල කිරීමට උත්සාහ කළ නමුත් එහි ප්‍රතිඵලයක් ලෙස ගින්නක්, හානියක් හෝ ජීවිත හානි කිසිවක් සිදු නොවූ බවයි විදෙස් මාධ්‍ය වාර්තා පෙන්වා දෙන්නේ.
