යුක්රේනයේ කියෙව් ප්‍රදේශයේ පෙර පාසලක් ආසන්නයට හෙලිකොප්ටරයක් කඩා වැටීමෙන් එහි ගමන් කළ යුක්‍රේන අභ්‍යන්තර කටයුතු අමාත්‍යවරයා, ඔහුගේ නියෝජ්‍ය අමාත්‍යවරයා ඇතුළු 16 දෙනෙකු ජීවිතක්ෂයට – විදෙස් මාධ්‍ය
කියෙව් අගනුවර නැගෙනහිර ප්‍රදේශයක ළදරු පාසලක් අසල හෙලිකොප්ටරයක් කඩා වැටීමෙන් යුක්රේනයේ අභ්‍යන්තර කටයුතු අමාත්‍යවරයා ඇතුළු 18 දෙනෙකු මිය ගොස් තිබෙනවා.
මියගිය අය අතර කුඩා දරුවන් තිදෙනෙකු සිටින අතර තවත් 15 දෙනෙකු රෝහල්ගතව ප්‍රතිකාර ලබන බවයි විදෙස් මාධ්‍ය වාර්තා කළේ.
මියගිය ඇමති ඩෙනිස් මොනස්ටිර්ස්කි තවත් අට දෙනෙකු සමඟ හෙලිකොප්ටරයේ ගමන් කරමින් සිට තිබෙනවා.
ඔහුගේ නියෝජ්‍ය අමාත්‍යවරයා සහ රාජ්‍ය ලේකම්වරයා ද මිය ගිය බවටයි අනාවරණ වී ඇත්තේ.
මෙම හෙලිකොප්ටරය යුක්රේනයේ රාජ්‍ය හදිසි සේවයට අයත් එකක් බව සඳහන්.
Kyiv හි ප්‍රාදේශීය හමුදා පරිපාලනයේ ප්‍රධානී Oleksiy Kuleba පැවසුවේ මෙම අනතුරින් 29 දෙනෙකු තුවාල ලබා ඇති අතර 18 දෙනෙකු මිය ගිය බවයි.
අනතුරෙන් පසු ළදරු පාසල ආසන්නයේ ගින්නක් හටගත් අතර ළමුන් සහ කාර්ය මණ්ඩලය ගොඩනැගිල්ලෙන් ඉවත් කර තිබෙනවා.
අනතුර සිදුවන අවස්ථාවේ ප්‍රදේශයේ දැඩි අඳුරක් සහ මීදුමක් පැවති අතර මූලික වාර්තා අනුව හෙලිකොප්ටරය කඩා වැටීමට පෙර ගොඩනැගිල්ලක ගැටී ඇති බව සඳහන්.
