හදිසි අනතුරකට ලක්ව ත්රිකුණාමලය රෝහලේ ප්රතිකාර ලබමින් සිටියදී මොළය මියගිය බවට වෛද්යවරුන් තහවුරු කළ 19 හැවිරිදි තරුණයකුගේ අක්මාව හා වකුගඩු මරණාසන්න රෝගීන් තිදෙනකුට බද්ධකර ඇත. එමගින් ඔවුන්ගේ ජීවිත බේරා ගැනීමට වෛද්යවරුන් කණ්ඩායම ඊයේ (20 වැනිදා) සමත්ව තිබේ.
අක්මා බද්ධය කොළඹ ජාතික රෝහලේද වකුගඩු බද්ධ කිරීම් දෙක මහනුවර ජාතික රෝහලේදී සහ අනුරාධපුර ශික්ෂණ රෝහලේදී සිදුකර ඇත.
මෙලෙස රෝගීන් තිදෙනකුගේ ජීවිත බේරාගැනීම සඳහා ශරීර අවයව ලබාගෙන ඇත්තේ මාවනැල්ලේ පදිංචි පසිඳු ගිම්හාන් රත්නායක නමැති තරුණයාගෙනි.
මාවනැල්ල හෙම්මාතගම පදිංචි මෙම තරුණයා තම මව,නැගණිය හා ඇයගේ දරුවන් සමඟ මිත්තණිය බැලීමට ත්රිරෝද රථයකින් ත්රිකුණාමලය බලා පසුගිය 16 වැනිදා ගමන් ගනිමින් සිටියදී ඔහු පැදවූ ත්රිරෝද රථය වෑන් රථයක ගැටී ඇත. ඉන් බරපතළ තුවාල ලත් තරුණයා ප්රතිකාර සඳහා ත්රිකුණාමලය රෝහලට ඇතුළත් කර තිබේ.
මෙහි දැඩි සත්කාර ඒකකයේ යන්ත්ර මගින් හෘද ස්පන්ධනය පවත්වාගෙන යද්දී තරුණයාගේ මොළය මියගිය බව වෛද්යවරු තහවුරු කිරීමෙන් පසු ඔහුගේ අක්මාව හා වකුගඩු දෙක තවත් ජීවිත තුනක් බේරා ගැනීම සඳහා පරිත්යාග කිරීමට මව කැමැත්ත පළකර ඇත.
ඒ අනුව ත්රිකුණාමලය රෝහලේ වෛද්යවරුන්ගේ දැඩි කැපවීම මත තරුණයාගේ අවයව ඉවත් කිරීමේ ශල්යකර්ම සිදු කිරීමෙන් පසු අක්මාව කොළඹ රෝහලටත් වකුගඩු මහනුවර හා අනුරාධපුර රෝහල්වලටත් කඩිනමින් රැගෙන ගොස් අදාළ බද්ධ කිරීම් කර තිබේ.
මහනුවර ජාතික රෝහලට වකුගඩුව ගෙන ඒමෙන් පසු එය 33 හැවිරිදි පුද්ගලයෙකුට බද්ධ කිරීමේ සැත්කම විශේෂඥ ශල්ය වෛද්ය පී.ආර් හරිශ්චන්ද්ර මහතා සිදුකර ඇත. කොළඹ ජාතික රෝහලේ අක්මා බද්ධය විශේෂඥ ශල්ය වෛද්යවරුන් වන රුවන් දිසානායක සහ රොහාන් සිරිසේන යන මහත්වරු විසින්ද අනුරාධපුර රෝහලේ වකුගඩු බද්ධය විශේෂඥ වෛද්ය අවන්ත මාරසිංහ මහතා විසින්ද සිදුකර ඇත.
wpDiscuz
