වැලිගම මිරිස්ස සංචාරක හෝටලය අසළ වෙරළ තිරයෙදී තියුණු ආයුධයකින් පහරදී පුද්ගලයෙකු ඝාතනය කිරීමේ සිද්ධිය සම්බන්ධයෙන් සැකපිට සිව්දෙනෙක් අත්අඩංගුවට ගෙන තිබෙනවා.
ඒ අතර කාන්තාවන් තිදෙනෙක් ද වන බවයි පොලීසිය සඳහන් කළේ.
මිරිස්ස සීක්රටි බිච් හෝටලය අසල වෙරළ තිරයේ බිම් කොටසක් සම්බන්ධව ඇතිවූ ආරවුලක් දුරදිග යෑමෙන් පසු ඊයේ (16)දින උදෑසන සංචාරක හෝටල් හිමියන් දෙපිරිසක් අතර ගැටුමක් හටගෙන තිබුණා.
එහිදී එම ප්රදේශයේම පදිංචි සංචාරක ව්යාපාරිකයකු සහ ඔහුගේ පුත්රයකු තවත් සංචාරක ව්යාපාරිකයෙකුට තියුණු ආයුධයකින් පහර දී තිබෙනවා.
පහරදීම හේතුවෙන් බරපතළ තුවාල ලැබූ පුද්ගලයා මාතර මහ රෝහලට ඇතුළත් කරන අවස්ථාවේදීම ජීවිතක්ෂයට පත්වුණා.
එලෙස ජීවිතක්ෂයට පත් වුණේ 38 හැවිරිදි මිරිස්ස පෙම් උයන්වත්ත ප්රදේශයේ පදිංචි සෙල්ලා හැන්නදිගේ සුරංග නොහොත් බාල සුරංග නැමැත්තායි.
ඔහු මාකඳුර මධූෂ්ගේ ගෝලයෙකු බව පැවසෙන සන්ෂයින් සුද්දාගේ සමීපතමයෙකු බවට තොරතුරු වාර්තා වී ඇති බව පොලීසිය පැවසුවා.
මෙම ඝාතන සිද්ධියට සම්බන්ධව මේ වන විට කාන්තාවන් තිදෙනෙක් ඇතුලු සිව්දෙනෙක් අත්අඩංගුවට ගෙන තිබෙනවා.
අත්අඩංගුවට ගත් සැකකරු දෙවිනුවර ප්රදේශයේ පදිංචි 18 හැවිරිදි අයෙක්.
සැකකාරියන් වයස අවුරුදු 18, 40 සහ 55 යන වයස්වල පසුවන මිරිස්ස සහ අහංගම යන ප්රදේශවල පදිංචිකරුවන්.
ඝාතනයට සම්බන්ධ සැකකරුවන් දෙදෙනෙක් ප්රදේශයෙන් පළාගොස් ඇති අතර ඔවුන් සොයා වැඩිදුර විමර්ශන ක්රියාත්මකයි.
