මියගිය පුද්ගලයෙකුගේ දේහය ගෙදරට ගෙනවිත් දිනකට පසු පොලිසිය ඇවිත් ආපහු රෝහලට ගෙනියලා (වීඩියෝ)

මියගිය පුද්ගලයෙකුගේ දේහය රෝහලේ සිට නිවසට ගෙනවිත් දිනකට පසු යළිත් පොලිසිය පැමිණ දේහය රෝහල වෙත රැගෙන ගිය පුවතක් කලවාන, බෝපිටිය ප්‍රදේශයෙන් වාර්තා වනවා.

පසුගිය 05 වනදා කලවාන, බෝපිටිය ප්‍රදේශයේ පදිංචිව සිටි පුද්ගලයෙක් දෙල් කැඩීමට ගොස් ගසෙන් වැටී බරපතළ තත්ත්වයෙන් පොතුපිටිය රෝහලට ඇතුළත් කර තිබෙනවා.

අනතුරුව එම රෝගියා වැඩිදුර ප්‍රතිකාර සඳහා ත්නපුර රෝහලට මාරුකර යවා ඇති අතර, ඔහු එම රෝහලේ දින 20ක පමණ කාලයක් ප්‍රතිකාර ලබමින් සිටිය දී පසුගිය 25 වනදා මියගොස් ඇති බවයි වාර්තා වුණේ.

මෙලස මියගොස් ඇත්තේ චමින්ද කුමාර නැමැති වයස අවුරුදු 46ක තිදරු පියෙක්.

පසුව රෝහල විසින් මිය ගිය පුද්ගලයාගේ දේහය ඔහුගේ ඥාතීන්ට භාරදී ඇති අතර, අනතුරුව එම්බාම් කටයුතු ද සිදුකර දේහය නිවසට ගෙනවිත් තිබෙනවා.

අනතුරුව පෙරේදා (26) දිනයේ පොලිසියෙන් නිවසට පැමිණ යළි මෘත දේහය රෝහල වෙත රැගෙන යාමට අවශ්‍ය බවයි පවසා ඇත්තේ.

දේහය පිළිබඳව පශ්චාත් මරණ පරීක්ෂණයක් සිදුකළ යුතු බව එම නිලධාරීන් ඥාතීන්ට පවසා ඇති අතර, මියගිය පුද්ගලයාගේ බිරිඳ පවසා ඇත්තේ සැමියාගේ මරණය පිළිබඳව කිසිදු සැකයක් නොමැති බවයි.

කෙසේ වෙතත් පොතුපිටිය පොලිසිය අධිකරණයෙන් ලබාගත් නියෝගයක් සහිතව දේයට යළිත් කලවාන රෝහල වෙත රැගෙන යාමට කටයුතු කර ඇති බවයි වාර්තා වුණේ.

මේ පිළිබඳව ඥාතීන් අදහස් දක්වමින් සඳහන් කළේ මෙලෙස මරණයක් රැගෙනයාමටත් නැවත රැගෙන ඒමටත් ආර්ථික තත්ත්වයක් තමන්ට නොමැති බවයි.