තමාව අත්අඩංගුවට ගැනීමේ සූදානමක් පවතින බැවින් තමන්ට අපේක්ෂිත ඇපයක් ලබාදෙන ලෙස ඉල්ලා හිටපු කම්කරු හා විදේශ රැකියා අමාත්‍ය මනුෂ නානායක්කාර ඉදිරිපත් කර ඇති ඇප අයදුම්පතක් සම්බන්ධයෙන් කරුණු දැක්වීම සඳහා මෙම මස 20 දින අධිකරණයේ හමුවේ පෙනී සිටින ලෙස දන්වා අපරාධ පරීක්ෂණ දෙපාර්තමේන්තුවේ ස්ථානාධිපතිවරයාට හා සමුද්‍රීය අපරාධ විමර්ශන කොට්ඨාසේ ස්ථානාධිපතිවරයාට නොතීසී නිකුත් කරන ලෙසට කොළඹ ප්‍රධාන මහේස්ත්‍රාත් තනුජා ලක්මාලි මහත්මිය නියෝග කළා.
හිටපු අමාත්‍යවරයා ජනාධිපති නීතිඥ සාලිය පීරිස් මහතා ඇතුළු නීතිඥ කණ්ඩායමක් මගින් ගොනු කළ ඇප අයදුම්පතක් සලකා බලමින් අධිකරණයෙන් එසේ නියම කෙරුණා.
ශ්‍රී ලංකාව හා දකුණු කොරියාව අතර කෘෂිකාර්මික හා ධීවර සේවක වැඩසටහනකට අදාළ ව පෙත්සම්කරු අත්සන් කර ඇති අවබෝධතා ගිවිසුමක් හා E8 වීසා ගැටලුවක් සම්බන්ධයෙන් අපරාධ පරීක්ෂණ දෙපාර්තමේන්තුව තම සේවාදායකයා අත්අඩංගුවට ගැනීමේ සූදානමක් පවතින බව ද නීතිඥවරු එම අප අයදුම්පත යොමු කරමින් අධිකරණය හමුවේ පැවසුවා.
පෙත්සම්කරුට හිමිව තිබූ බලතල අනුව නිල කටයුත්තක් ලෙස ඊට අත්සන් තබා ඇති නමුත් එය ඔහු පෞද්ගලිකව සිදුකළ ක්‍රියාවක් නොවන බවද නීතිඥවරු අධිකරණයට දැනුම්දුන්නා.
ඔහු සිදු කර ඇත්තේ ඇමතිවරයා වශයෙන් රජයන් දෙකක් අතර අවබෝධතා ගිවිසුමක් අත්සන් කිරීම පමණක් බවත් එබැවින් ඔහුට එරෙහිව අපරාධ නඩුවක් පවත්වාගෙන යාමට හැකියාවක් නොමැති බැවින් පෙත්සම්කරුට අපේක්ෂිත ඇපයක් නියම කරන ලෙසට ද නීතිඥවරු අධිකරණයෙන් ඉල්ලා සිටියා.
එම කරුණු සලකා බැලු මහේස්ත්‍රාත්වරිය ඒ පිළිබඳ ව සලකා බැලීම කල් තැබුවා.
